मखंया कुमारी माजुयात मरःजा ः

येँ (नेपालभाषा टाइम्स)-पाहां चःह्रे नखःया झ्वलय् म्हिगः येँया थीथी थासय् मस्तय्त मरःजा नकेगु ज्या जुल । थ्व झ्वलय् थनया मखं त्वालय् मखं कुमारी माजुयात नं मरःजा नकल । मखं कुमारीयात मखनय् हे मरःजा नकी । उगु इलय् मेपिं नं थीथी मस्तय्त मरः नकूगु खः ।

पाहां चःह्रेबलय् नकीगु थ्व मरःजा तान्त्रिक विधिं पुजा यानाः थुयातःगु दइ । थ्व जा नल धाःसा मस्तय्त बर्खा यामय् जुइगु छुं नं कथंया ल्वचं थी फइ मखु धाइ । मरःजा खास यानाः कय्तापुजा व इहि मयाःनिपिं मस्तय्त नकेगु याइ । येँय् मखं नापं भिंद्यःत्वाः, तेबहाः, वंघः, त्यंगः, कंग आदि थासय् मरः नकेगु याइ ।

येँय् पाहां चःह्रे नखः स्वन्हु तक तःजिक न्यायेकीगु चलन दु । थ्व झ्वलय् थौं अन्तिम न्हि खः । थौं न्हिनय् २ बजे असनय् द्यः ल्वाकीगु ज्याझ्वः दु । थौं असनय् कंग अजिमा, वटु भद्रकाली व तेबहाः भद्रकाली खःया तिंप्वाः हिलाः जात्रा याइगु खः ।

थ्वहे स्वखलः द्यःयात म्हिगः बहनी तिंख्यलय् नं हयाः द्यः ल्वाकूगु खः । पाहां चःह्रेलय् येँया थीथी अजिमा द्यःपिनि जात्रा जुइगु खःसां खः ल्वाकाः जात्रा याइगु धाःसा थ्वहे स्वखलः द्यःया खः । म्हिगः तिंख्यलय् सल ब्वाकाः घोडेजात्रा याःगु खःसा यलय् कांम्ह सल ब्वाकेगु ज्या जूगु खः ।