मोहनिबलय् ग्याँस मदइगु ख्याच्वः

येँ – मोहनि नखः न्ह्यःने वयाच्वंगु इलय् भारतीय ढुवानीकर्तातय्सं ग्याँस आपूर्ति पनेगु ख्याच्वः बिउगु दु । भारतीय ढुवानीकर्तातय्सं डिजेलया भाः थहां वंगु धासें आःया हे भावं ग्याँस ढुवानी याये मफइगु खँ धाःगु दु । ढुवानीकर्ताया ख्याच्वः लिपा सरकारं समस्या ज्यंकेत कुतः न्ह्याकूगु दु । उद्योग, वाणिज्य आपूर्ति मन्त्रालयं समस्या ज्यंकेत छगू समिति नं नीस्वंगु दु । समितिं बिउगु सुझावया आधारय् समस्या सम्बोधन यायेगु खँ धाःगु दु ।

भारतं हयेमाःगु ग्याँस ढुवानी यायेगु लागिं भारतं नेपाःया ग्याँस बुलेटतय्त धाःसा अनुमति बियातःगु मदु । नेपाःयात बीमाःगु ग्याँस भारतीय बुलेटं हे नेपाः थ्यंक वयाः तः वयेगु याइ । भारतं थथेहे इलय् ब्यलय् दुःख बीगु जूगुलिं नेपाःयात माःगु ग्याँस नेपाः थःपिंसं हे ढुवानी यायेगु धकाः न्याना हःगु बुलेट तकं थौंकन्हय् अथें वांछ्वया तयेमाःगु अवस्था दु ।