संविधान संशोधन बहसपत्र : दुजःतय्त हे जानकारी मबिसे प्रतिवेदन लःल्हात
येँ (नेपालभाषा टाइम्स) – संविधान संशोधनया निंतिं बहसपत्र तयार यायेत सरकारं नीस्वंगु कार्यदलं कार्यदलया दुजःपिंत जानकारी हे मबिसे सरकारयात प्रतिवेदन लःल्हाःगु दु । कार्यदलं बिहीवाः प्रतिवेदन लःल्हाःगु खः ।
सरकारयात लःल्हाःगु प्रतिवेदन बारे थःपिंत जानकारी मदुगु खँ कार्यदलया दुजः राष्ट्रिय प्रजातन्त्र पार्टीया प्रतिनिधि श्यामबहादुर शाहीं कनादीगु दु । कार्यदलया म्याद बिहीवाः तक जक खःसा उकुन्हु हे प्रतिवेदन सरकारयात लःल्हाःगु खः ।
शाहीं धयादिल, ‘बिहीवाः तक कार्यदलया म्याद खः । तर कार्यदलया बैठक च्वंगु मदुनि । सरकारयात प्रतिवेदन लःल्हात धइगु हल्ला न्यनागु दु । तर जिमिसं प्रतिवेदनय् छु छु खँ दुथ्यात धयागु मसिउ ।’ वय्कलं बिहीवाः कार्यदलया लिपांगु न्हिं जूगुलिं थम्हं कार्यदलया संयोजक असिम शाहयात फोन यानागु खःसा लिसलय् ‘माल धाःसा खबर याये’ धकाः धाःगु तर थौं फोन तकं मल्ह्वंगु खँ वय्कलं कनादिल ।
सरकारं वंगु चैत १६ गते संविधान संशोधनया बहसपत्र तयार यायेत प्रधानमन्त्री बालेन साहया राजनीतिक सल्लाहकार शाहया संयोजकत्वय् कार्यदल दयेकूगु खः । वंगु चैत २५ गते निसें ज्या न्ह्याकूगु कार्यदलं निक्वःखुसी थप जूगु म्याद दुने प्रतिवेदन लःल्हाःगु खः । तर प्रतिवेदन लःल्हायेगु इलय् तक थीथी राजनीतिक पार्टीपाखे प्रतिनिधित्व यानाच्वंपिसं धाःसा कार्यदल त्वःतेधुंकूगु दु ।
वंगु असार २३ गते संविधान संशोधन बहसपत्र कार्यदलया कार्यशैली व क्षेत्राधिकारयात कयाः गम्भीर न्ह्यसः थँसें लोकतान्त्रिक समाजवादी पार्टी (लोसपा), जनता समाजवादी पार्टी (जसपा) व नेपाली कम्युनिष्ट पार्टी (नेकपा) या प्रतिनिधिपिसं कार्यदलया त्वःतागु घोषणा याःगु खः । स्वंगू दलं कार्यदलया संयोजकया नामय् पौ च्वयाः संविधानया मूल मर्म व भावना अःखः ज्या जुयाच्वंगु द्वपं बिउगु खः । कार्यदलं संविधानया फुक्कं धारा व उपधारात खुला यानाः सुझाव मुंकूगुयात ‘संविधान पुनर्लेखन’ कुतः जूगु धासें लोसपाया लक्ष्मणलाल कर्ण, जसपाया डा. सुरेन्द्र झा, नेकपापाखे देव गुरुङं कार्यदल त्वःतूगु खः ।
थ्वयां निन्हु लिपा एमालें कार्यदलयात पौ च्वाः एमालेया प्रतिनिधियात औपचारिक रुपं लित सःतूगु खः । कार्यदलया कार्यशैली व दिशा प्रति असन्तुष्टि प्वंकूसें एमालेया प्रतिनिधि डा. भीम अधिकारीयात लित सःतूगु खः । एमालेया महासचिव शंकर पोखरेलं कार्यदलया संयोजक शाहयात पौ च्वयाः अधिकारीयात लित सःतूगु खः ।
कार्यदलं प्रतिवेदन तयार यायेगु झ्वलय् २२ गू औपचारिक व अनौपचारिक बैठक तःगु खःसा १८४ म्ह विज्ञत लिसे सहलह यानागु जानकारी बिउगु दु । उकथं हे स्वदेश व विदेशय् च्वंपिं नेपाःमिपाखें ४४ हजार ६१३ गू डिजिटल सुझाव कार्यादलयात वःगु खँ धाःगु दु ।
कार्यदलं नेपाःया संविधान निर्माणया ऐतिहासिक दस्तावेज, संविधान सभाया समितिया प्रतिवेदन, राष्ट्रिय व अन्तर्राष्ट्रिय अभ्यास लिसे नजिरया अध्ययन यानाः वःगु सुझावयात थीथी २० गू क्षेत्रय् वर्गिकरण यानाः प्रतिवेदन तयार यानागु खँ धाःगु दु ।
LEAVE YOUR COMMENTS