मेलम्ची आयोजना अझं अनिश्चित

येँ – मेलम्ची खानेपानी आयोजना दयेकेगु ज्याय् ठेकेदार कम्पनीं तसकं ढिलासुस्ती यानाच्वंगु खँ धाःगु दु । वंगु चैत्र २७ गते मेलम्चीया सुरुङ म्हुइगु ज्याया ‘ब्रेक थ्रु’ जूगु खःसां वयां लिपा धाःसा माःकथं ज्या मन्ह्याकूगुलिं मेलम्ची आयोजना दयेकेगु ज्या लिबानाच्वंगु खँ आयोजनां धाःगु दु ।

आयोजनाया जिम्मा इटालियन कम्पनी को–अपरेटिभ मुरातोरी सिमेन्टिक डि रेभेनां काःगु खः । ब्रेक थ्रु लिपा ठेकेदार कम्पनीं ६.५ किलोमिटर जक सुरुङ फिनिसिङ यायेगु ज्या क्वचायेकूगु खः । आर्थिक अभाव जूगु त्वहचिनाः ठेकेदार कम्पनीं ज्या यायेगु लिबाकाच्वंगु खँ आयोजनां धाःगु दु । कम्पनी गबलें ज्या छन्हु निन्हु ज्या याइगु व गबलें ज्या हे मयाइगुलिं आयोजना इलय् क्वचायेकेत थाकुयाच्वंगु खँ धाःगु दु ।

आयोजनाया कथं कम्पनीं बांलाक ज्या यात धाःसा न्हिं ९० मिटर टनेल फिनिसिङ यायेगु क्षमता दुसां नं उकथं ज्या यानाच्वंगु मदु । आयोजनाया टनेल सफा यायेगु ज्या आः १९ किलोमिटर जक दनिसा लछिया ८ निसें ९ किलोमिटर फिनिसिङ यात धाःसा निलांनिसें स्वलाया दुने कम्पनीं ज्या क्वचायेकेफुगु खँ नं आयोजनां धाःगु दु ।

मेलम्चीया न्हापांगु चरणय् न्हिं १७ करोड लिटर लः येँय् हयेगु कथं आयोजनां ज्या न्ह्याकाच्वंगु खः । लिसें निगूगु चरणय् याङ्ग्री व लार्के खुसिया नं १७ व १७ करोड लिटर लः येँय् हयेगु कथं आयोजनां सम्भाव्यता अध्ययन यानाच्वंगु दु । आयोजनं मेलम्चीया लः येँय् हयाः प्रशोधन यायेगु प्रशोधन केन्द्र नं दयेके क्वचायेके धुंकूगु दुसा मेगु साढे ८ करोड लिटर लः प्रशोधन केन्द्र दयेकेगु ज्या नं २० प्रतिशत क्वचायेधुंकूगु दु । इलय् ज्या मजूगुलिं आः मेलम्चीया लः गबले वइ धकाः धाये मफुगु खँ धाःगु दु ।

सम्बन्धित बुखँ

LEAVE YOUR COMMENTS