सु जुइ बागमतिया मुख्यमन्त्री ?
येँ – बागमति प्रदेशय् नेपाली कांग्रेसं छुं ईया नितिं थःपिंत प्रदेश सरकारया नेतृत्व याकेत इनाप याःगु खँ सीदुगु दु । प्रधानमन्त्री शेरबहादुर देउवां छुं ईया नितिं थः सतिम्ह प्रदेश सांसद इन्द्रबहादुर बानियाँयात प्रदेशया मुख्यमन्त्री दयेकेगु प्रस्ताव याःगु खः । तर न्यागू दलीय गठबन्धनया मू घटक नेकपा एकीकृत समाजवादीं उकियात स्वीकार याइ मयाइगु धइगु बारे निश्चित मजूनि ।
कांग्रेसं निलात्या ईया नितिं बानियाँयात मुख्यमन्त्री दयेकेगु प्रस्ताव याःगु खः । कांग्रेसया महाधिवेशन न्ह्यःने वयाच्वंगुलिं देउवां थः सतिम्ह बानियाँयात मुख्यमन्त्री दयेकाः उकिया प्रभाव महाधिवेशनय् लाकेगु कुतः यानाच्वंगु आशंका यानाहःगु दु । पार्टीया महाधिवेशन क्वचाःगु झिंन्यान्हु लिपा नेकपा (एस) यात सत्ता हस्तान्तरण यायेगु कथं देउवां थ्व प्रस्ताव तःगु खँ सूत्रं धाःगु दु ।
नेकपा एसं संसदीय दलया नेता राजेन्द्र पाण्डेयात मुख्यमन्त्री दयेकेगु प्रस्ताव यानातये धुंकूगु अवस्थाय् देउवाया प्रस्तावयात पार्टीं गुकथं काइ धइगु खँ स्पष्ट मजूनि । थ्वहे झ्वलय् थौं च्वनीगु न्यागू गठबन्धन दलया बैठक लिपा कांग्रेसयात मुख्यमन्त्री बीगु वा मबीगु धइगु निर्णय जुइ फइगु खँ धाःगु दु ।
थौं च्वनीगु गठबन्धन दलया बैठकं संघीय सरकारया मन्त्रिपरिषद विस्तार यायेगु निर्णय नं यायेफुगु खँ धाःगु दु । संघीय मन्त्रालय बाँडफाँड लिपा प्रदेशय् नं उकथं न्ह्याःवनेगु समझदारी न्यागू गठबन्धन दल दथुइ जुयाच्वंगु दु ।
थ्वहे झ्वलय् बागमति प्रदेश सरकारया मुख्यमन्त्री अष्टलक्ष्मी शाक्यं विश्वासया मत कायेगु तयारी याःगु दु । सरकारया प्रवक्ता लिसें भौतिक पूर्वाधार विकास मन्त्री केशवराज पाण्डेया कथं वइगु असोज २३ वा २५ गते गुक्वःगु अधिवेशन सःताः मुख्यमन्त्री शाक्यं विश्वासया मत कायेगु तयारी यानाच्वंगु खः । मुख्यमन्त्री शाक्ययात वइगु २५ गते दुने विश्वासया मत कायेमाःगु संवैधानिक बाध्यता दु । संविधान कथं मुख्यमन्त्री नियुक्त जूगु लछिया दुने विश्वासया मत कायेमाः ।
नेकपा एमाले विभाजित जुइधुंकाः बागमति प्रदेशय् मुख्यमन्त्री शाक्य अल्पमतय् दु । बागमति प्रदेशय् माओवादी केन्द्रया २३, कांग्रेसया २२, एकीकृत समाजवादीया १३ म्ह सांसद दुसा बहुमतया नितिं ५५ सांसद माः । गठबन्धनयाके आः ५८ म्ह सांसद दु ।
LEAVE YOUR COMMENTS