यलय् नेपालभाषा ब्वंकेत दँय्दसं बजेट अप्वयेका यंकीगु

यल(नेपालभाषा टाइम्स)-यल महानगरपालिकां थः मातहत लाःगु फुक्कं सामुदायिक व संस्थागत विद्यालयय् नेपालभाषाया माध्यमं स्थानीय विषय ब्वंकेगु लागिं शिक्षक व्यवस्थापनया तयारी न्ह्याकूगु दु ।

यल मनपाया मेयर चिरिबाबु महर्जनं शिक्षक व्यवस्थापन यायेगु ज्याय् छुं नं कथंया त्रुटि मजुइमा धइगु खँय् थःपिं सतर्क जुयागु धासें थुगु दँय् थुकिया लागिं पर्याप्त बजेट मगाःसां ज्या मदिकुसे न्ह्याकेगु व आकिवं बजेट थपे यानाः जूसां शिक्षक व्यवस्थापनयात पूर्णता बीगु खँ कनादिल ।

थुगु दँय् बजेट मगाः धकाः नेपाल–भाषा ब्वंकेगु ज्या मदिकेगु, बरु थुकियात प्रस्थान विन्दूया रुपय् कयाः दँय्दसं बजेट थपे याना वनेगु खँ नं वय्कलं कनादिल ।
अथे हे यल मनपाया प्रवक्ता लिसें वडा ९ या वडा अध्यक्ष राजु महर्जनं थुगु दँय् न्ह्याथे यानाः नं ब्वंकेगु शुरु यायेगु व बजेट मगाःसा गुलि दु उलिं जूसां ज्या निं न्ह्याका छ्वयेमाःगु खँ तयादिल ।

यल मनपां नर्सरींनिसें स्वंगू तगिं तक नेपालभाषा ब्वंकेगु निर्णय याःगु दुसा उकिया पाठ्यक्रम नं तयार यायेधुंकूगु दु । गुलिखे स्कुलय् पाठ्यक्रमया आधारय् ब्वंकाच्वंगु दु । आः पाठ्यसफू नं तयार जुयाच्वंगु खँ पाठ्यक्रम निर्माण समितिया कजि तुल्सीलाल सिंहं कनादिल । सफूया लागिं नांजाःम्ह चित्रकार वत्सगोपाल वैद्यं आवश्यक किपा च्वयादीगु दु ।

यलय् नेपालभाषाया माध्यमं स्थानीय विषय ब्वंकेगु बारे म्हिगः मेयर महर्जन– लिसे जूगु सहलहया झ्वलय् वय्कलं थ्व खँ कनादीगु खः ।

सहलह ज्याझ्वलय् पाठ्यक्रम निर्माण समितिया मेपिं दुजःपिं लिसें नेवाः वस्ती नेवाः स्कुलया दिपक तुलाधर, नेपालभाषा टाइम्सया सुरेश किरण लगायतया दुजःपिनि उपस्थिति दुगु खः ।