ने. सं. ११४३ तछलाथ्व त्रयोदशी -

‘थ्व देशय् हानं युद्ध जुइतिनि’

येँ – आदिवासी जनजाति आन्दोलनया न्ह्यलुवा पद्मरत्न तुलाधरं थौं जनजाति आन्दोलन कमजोर जुल धकाः छतिं नं निराश जुइम्वाः, आन्दोलन हानं नं तच्वया वनी तिनि, थ्व देशय् हानं नं अधिकारया लागिं मेगु युद्ध जुइतिनि धयादीगु दु ।

वय्कःया ज्याःजंक्वया लसताय् म्हिगः आदिवासी जनजाति राष्ट्रिय आन्दोलन नेपालया ग्वसालय् जूगु ‘जातीय एवं भाषिक आन्दोलनय् पद्मरत्न तुलाधरया भूमिका’ विषयक गोष्ठीइ न्ववासें वय्कलं थ्व खँ धयादीगु खः ।

जनजाति नेता सीताराम तामाङं नेपाःया वर्तमान संविधान वा महेन्द्रवादी प्रतिक्रियावादी संविधान खः धासें आदिवासी जनजातिं माग यानाच्वंगु संविधान दयेकेगु खःसा हानं नं आन्दोलन यायेमाःगु आवश्यकता दनि व अज्याःगु आन्दोलनया लागिं पद्मरत्न तुलाधरया नेतृत्व अझ नं आवश्यक दनि धयादिल ।

वय्कलं धयादिल, ‘थौं आन्दोलन कमजोर जुयाच्वंगु इलय् प्रदेशया नां प्रस्तावित जुयाच्वंगु दु, थुकी जनजातिं न्ह्यलं चायेकेमाः ।’

प्राज्ञ वैरागी काइँलां २०४७ सालया संविधानं आदिवासी जनजातियात बियातयेधुंकूगु अधिकार तकं आः गणतन्त्र वयेधुंकाः हनन जुयाच्वंगु खँ न्ह्यथँसें देशय् हानं छक्वः आन्दोलनया डिस्कोर्स सुरु यायेमाःगु दु धयादिल ।

सुरेश आलेमगरं आदिवासी जनजाति आन्दोलनय् पद्मरत्न तुलाधर छम्ह सर्वमान्य व्यक्ति जुयादी धयादिल । ज्याझ्वःया सभापति लिसें जनजाति नेता परशुराम तामाङं वर्तमान संविधानय् धर्म निरपेक्षता, संघीयता दुगु जुयाः जनजातिं बछि युद्ध त्याकूगु हे खः, आः मेगु बछि त्याकेगु लागिं हानं नं पद्मरत्नया हे नेतृत्वय् आन्दोलन यायेमाःगु दनि धयादिल ।ज्याझ्वलय् डा. ओम गुरुङ, डा. चुन्दा वज्राचार्य, लक्ष्मीदास मानन्धरं नं न्ववानादीगु खः।