पुखुली दनातःगु छायाँदेवी कम्प्लेक्स विरुद्ध स्थानीय

येँ – थनया थँबहिली दयेकाच्वंगु छाँयादेवी कम्प्लेक्स सार्वजनिक पुखुली दयेकूगु जूगुलिं उकियात खारेज यायेत स्थानीय जनतां माग याःगु दु । कित्ता नम्बर १६७ य् लाःगु उगु जग्गा न्हापा पलेस्वां पुखू जुयाच्वंगु खँ स्थानीय वासिन्दा भागवत नरसिंह प्रधानं कनादिल ।

सार्वजनिक पुखुली छेँ दनेगु सुरु जुइवं हे वय्कलं जिल्ला अदालतय् मुद्दा तयादीगु खःसां आः तक उगु मुद्दाया पेशी मजूगु खँ नं वय्कलं कनादिल । अदालतं तारेख बीगु यानाच्वंसां पेशी धाःसा मतःगुलिं कम्प्लेक्स दयेकेगु ज्या निरन्तर न्ह्यानाच्वंगु दु । अदालतय् विचाराधीन जुयाच्वंगु मुद्दायात वेवास्ता यासें कम्पनीं अन जबर्जस्ती निर्माण यानाच्वंगु खः ।

मालपोत कार्यालयया फिल्डबुकय् सार्वजनिक पुखू धकाः स्पष्ट च्वयातःगु दुसा लालपूर्जाय् नं पुखू हे च्वयातःगु दु । २०४४ सालय् सरकारया नामय् दुगु जग्गा आः व्यक्तिया नामय् वंगु खँ कनादिसें वय्कलं सार्वजनिक जग्गा व्यक्तिया नामय् गुकथं वन धइगु न्ह्यसः नं तयादिल । उगु कम्प्लेक्स दयेकाच्वंपिंसं सरकार हे थःपिनिगु खः धासें मुद्दाय् बूसां तकं ग्याये मखु धयाच्वंगु खँ नं वय्कलं कनादिल ।

थ्व कम्प्लेक्सय् थीथी राजनीतिक पार्टीया नेता व उमि परिवारं नं शेयर यानाः लगानी यानातःगु खँ सीदुगु दु । उगु सार्वजनिक पुखूयात कयाः प्रधान जक मखु आदिवासी जनजातिया वकिलतय् संस्था लार्हुनिपं नं मुद्दा तयातःगु दु । गुथि संस्थानया पदाधिकारीतय्सं थ्व जग्गा सार्वजनिक पुखू हे जूगु व झिदँ लिपा मुद्दा तःसां थुकिं हदम्याद लगे जुइ मखु धयाच्वंगु दु ।

तर गुथि थम्हं हे पनेगु ज्या धाःसा यानाच्वंगु मदु । सार्वजनिक पुखुली मोही लगे मजुइगु कानून दुसां उकिया मोही धकाः अम्बिका राणाया नां तयातःगु नं लूगु दु । वय्कलं बियादीगु जानकारी कथं भगवान बहाल न्ह्यःने च्वंगु खुल्ला चुक नं अम्बिका राणां थःगु नामय् दर्ता याना हयेधुंकूगु दु ।

१०४० नम्बर कित्ताया उगु जग्गा नं फिल्ड बुकय् चोक धकाः च्वयातःगु दु । छुं दँ न्ह्यः तक हे पुखू धकाः स्पष्ट सीदुगु जग्गाय् निजी छेँ दना हःगुलिं थुकी यक्व मनूतय् मिलोमतो दयेमाः धकाः अनुमान याना हःगु दु ।