
नेपाःया टेबुलटेनिस कासायात व्यावसायिक यानायंकेगु ज्याय् थप छपलाः न्ह्याःगु दु । टेबलटेनिसया राष्ट्रिय कासामि नविता श्रेष्ठयात बुधवाः विजेश्वरी सेकेन्डरी स्कुलं थः ब्रान्ड एम्बेस्डर दयेकाः टेबलटेनिस ख्यःयात व्यवासायिक रुपं क्वातुकेगु निंतिं तिबः बिउगु खः । नेपाःया सुं नं टेबलटेनिस कासामि थुकथं छुं व्यवसायिक ज्याय् ब्राण्ड एम्बेस्डर जूगु थ्व हे न्हापांखुसी खः ।
उकिं हे नविता व स्कूल दथुइ सम्झौताय् हस्ताक्षर यायेगु ज्याझ्वय् अखिल नेपाल टेबलटेनिस संघया अध्यक्ष चतुरानन्द वैद्यं धयादिल, ‘थ्व छगू ऐतिहासिक ज्या जुल । टेबलटेनिस ख्यलय् न्हूगु सुरुवात जूगु दु । थुकिं मेमेपिं विद्यार्थीपिंत नं टेबलटेनिस म्हितेत प्रेरित याइ ।’
नविता व स्कुल दथुइ बुधवाः छगू पत्रकार सम्मेलनया दथुइ हस्ताक्षर जूगु सम्झौता कथं स्कुलं थःगु ब्राण्ड प्रचारया निंतिं नविताया दछिया १ लाख २० हजार तका बीगु जूगु दु ।
न्हय्क्व तक राष्ट्रिय च्याम्पियन जुइधुंकूम्ह नविता विजेश्वरी स्कुलय् ब्वनाः अनं हे टेबलटेनिस म्हिता वःम्ह खः । पत्रकार सम्मेलनय् नवितां धाःगु दु, ‘जितः टेबलटेनिसय् थीथी ट्रेनिङ सेन्टरं निख्खारे यायेगु ज्या जक याःगु खः, जिं टेबलटेनिसया सुरुवात ला विजेश्वरी सेकेन्डरी स्कुलं हे यानागु खः , अले थनं हे टेबलटेनिसय् छुं याये धयागु लक्ष्य क्वःछिनागु खः ।’
नविता नर्सरी कक्षा निसें हे विजेश्वरीइ हे ब्वनावःम्ह खः । वया कथं छगू स्कूल स्तरीय प्रतियोगिताया झ्वलय् नवितां कास्य पदक त्याकेत ताःलात । कास्य पदक त्याकूगुलिं स्कुलं उबलय् हे वयात छात्रवृत्ति बिल । ‘कासा म्हिताः नं छात्रवृत्ति चूलाबलय् झन म्हितेगुलिइ नुगः क्वसात’ नवितां धाःगु दु, ‘बांलाःगु प्रशिक्षण बिना कासामि याकःचा जक न्ह्याः वनेफइमखु ।
तर स्कुलय् हे बांलाःगु प्रशिक्षणया व्यवस्था दुगुलिं लिफः स्वयेम्वाःल ।’विजेश्वरी स्कुलं जक नविता लिसें झिंछम्ह राष्ट्रिय स्तरया टेबलटेनिस कासामि उत्पादन यायेधुंकूगु दु । प्रिन्सिपल विन्दु तुलाधरं धयादी कथं एलिना महर्जन, एरिका महर्जन, रणुका खत्री, प्रदीप रोका, अनिस श्रेष्ठ, शनिषा श्रेष्ठ, विवेक श्रेठ सुनिता लामा, नोर्देन तामाङ, अस्मिता मानन्धर, रणुका रानामगर, मारिया थापा थेंज्याःपिं राष्ट्रिय स्तरया टेबलटेनिस कासामित विजेश्वरी स्कुलय् हे ब्वनाः अनं हे टेबलटेनिस म्हिता वंपिं खः ।
नवितां आः विजेश्वरी सेकेन्डरी स्कुलया निंतिं दछि तक ब्राण्ड एम्बेस्डर कथं ज्या याइ । थुकियात अझ थप याना यंकेफइगु खँ न्ह्यथँसें स्कुलया भाइस प्रिन्सिपल प्रकाश तुलाधरं धयादिल, ‘थ्व ला जिमिसं न्हय्क्वःतकया राष्ट्रिय च्याम्पियन नविताया उपलब्धिया कदर यानागु खः । थुकियात अझ व्यावसायिक रुपं न्ह्यःने न्ह्याका यंकेफइ ।’
LEAVE YOUR COMMENTS