च्यागू सफू छक्वलं
वरिष्ठ बाखं च्वमि मय्जु प्रकाश प्रधानाङ्गया कृति व व्यक्तित्वलिसे सम्बन्धित खुगू सफूया लिसें च्यागू सफू पिदन । भिक्षु सुदर्शन लुमन्ति पुचलं वंगु भदौ ९ गते च्यागुलिं सफूया छक्वलं विमोचन याःगु खः । पाहाँपिं सत्यमोहन जोशी, दुर्गालाल श्रेष्ठ, लक्ष्मण राजवंशी, बिजय सुब्बा, रेवती राजभण्डारी, भिक्षु ज्ञानपूर्णिक, सुवर्ण शाक्य व तेजेश्वर बाबु ग्वंगलं थुपिं सफूत विमोचन यानादीगु खः ।
ज्याझ्वलय् भिक्षु सुदर्शन स्मृति ग्रन्थ, मस्याङ् पाः (बाखं मुना), मांया पौ काययात (पत्र साहित्य), प्रकाश प्रधानाङ्गया जीवनया जः
(जीवनी), कलाकार (एकांकी नाटक अनुवाद), पुष्पलता श्रेष्ठका कृतिहरू (अनुवाद), नेपालका नारी साहित्यकारका कथाहरू (बाखं मुना), लिलाको सातौं ऋतु (कविता मुना) विमोचन जूगु खः ।
साहित्यकार प्रधानाङ्गं भिक्षु सुदर्शनया हे हःपालय् च्वयेगु सुरु यानादीगु खः । उकिं वसपोलया स्मृति ग्रन्थ वय्कलं हे च्वयाः पिथनादीगु खः । अथेहे ‘मस्याङ्पा’ वि.सं. २०२० य् पिदनेधुंकूगु मय्जु प्रधानाङ्गया बाखं मुनाया न्हूगु संस्करण खःसा ‘मांया पौ काययात’ वय्कलं थः काययात च्वयादीगु पौया संकलन खः ।
अथेहे ‘प्रकाश प्रधानाङ्गया जीवनया जः’ वय्कःया हे जीवनी खःसा कलाकार वय्कलं च्वयादीगु एकांकी नाटक मुना खः । मय्जु प्रधानाङ्ग नेवाःभासं एकांकी नाटक च्वयादीम्ह न्हापांम्ह मिसा च्वमि नं खः । ‘नेपालका नारी साहित्यकारका कथाहरू’ वय्कःया लिसें न्याम्ह मिसा बाखंच्वमिपिनि बाखं मुना खः ।
LEAVE YOUR COMMENTS