राजमार्ग सतकखण्डय् नं सुचुकुचु अभियान

ख्वप – थनया हनुमन्ते खुसि सुचुकुचु यायेगु अभियानय् लगे जुयाच्वंपिं अभियन्तातय्सं आः खुसिजक सुचुकुचु यायेगु मयासे सतकय् नं उकथंया अभियान न्ह्याकूगु दु । हनुमन्ते खुसि सुचुकुचु यायेगु अभियान न्ह्याका च्वंगु पुचलं आः अरनिको राजमार्ग खण्डया नं सुचुकुचु यायेगु ज्या न्ह्याकूगु दु ।

शनिवाः पतिकं हनुमन्ते खुसि सुचुकुचु यायेगु अभियान न्ह्याका वयाच्वंपिं इमिसं वंगु शनिवाः तसकं खुसिबाः वःगुलिं अभियानयात दिकेगु पलेसा राजमार्ग लागाया सुचुकुचु याःगु खः । सफाइ अभियानयात निरन्तरता बिया वनेगु क्रमय् थुकथं राजमार्ग सतकखण्डयात नं सुचुकुचु यायेगु अभियान न्ह्याकागु प्रतिनिधिसभा सदस्य महेश बस्नेतं कनादिल ।

वय्कलं धयादिल, ‘आः वइगु निला तक अरनिको राजमार्ग अन्तर्गत सूर्यविनायक निसें कोटेश्वर लागा तकं सुचुकुचु यायेगु जुइ, अले अनं लिपा हाकनं खुसियात हे केन्द्रीत यानाः थ्व अभियानयात निरन्तरता बिया वनेगु जुइ ।’