आः प्रधानमन्त्री केपी ओलीया हैसियत छु ?
येँ (नेपालभाषा टाइम्स) – संसद भंग जुइधुंकाः आः प्रधानमन्त्री केपी ओलीया हैसियत छु जुइ ? संविधान कथं संसद विघटन लिपा प्रधानमन्त्रीया पोजिसन काम चलाउ सरकार जक जुइगु खःसां नं आः तक उकियात कयाः गुगुं पक्षं स्पष्ट यायेगु ज्या धाःसा यानाच्वंगु मदु ।
संविधानविद् डा. पूर्णमान शाक्यया कथं आः प्रधानमन्त्रीया हैसियत काम चलाउ सरकार जक खः उकिं वय्कलं देशय् दूरगामी लिच्वः लाइगु छुं नं कथंया निर्णय याये दइ मखु। तर प्रधानमन्त्रीया आःया ज्या स्वयेबलय् वय्कलं अज्याःगु ज्या मयाइ धाये अवस्था धाःसा मदु। नेपालभाषा टाइम्सलिसे खँ ल्हासें डा. शाक्यं धयादिल, ‘दूरगामी लिच्वः लाइगु निर्णय यायेगु अधिकार प्रधानमन्त्रीयात मदु, तर यात धाःसा छु यायेगु ?’
आः प्रधानमन्त्रीं याइगु छुं नं कथंया महत्वपूर्ण निर्णय विरुद्ध सर्वोच्च अदालतय् मुद्दा दायर जुइ फइगु खँ नं वय्कलं कनादिल । वय्कःया कथं संविधानया धारा ७७ या उपधारा ‘१’ या (ग) य् प्रतिनिधिसभाया दुजः मजुल धाःसा प्रधानमन्त्री पदमुक्त जुइगु व्यवस्था दु ।
उकथं हे आदिवासी जनजाति वकिलतय् संस्था लाहुर्निपया महासचिव लिसें अधिवक्ता शंकर लिम्बुं नं संसद विघटन लिपा प्रधानमन्त्रीया ज्या काम चलाउ जक जुइ धयादीगु दु । वय्कलं नं प्रधानमन्त्री ओलीं आः गुगुं कथंया दुरगामी लिच्वः लाइगु निर्णय याये दइ मखु धासें धयादी, ‘संविधानत आः प्रम ओलीं छुं नं कथंया दुरगामी लिच्वः लाइगु निर्णय याये मजिउ, तर संविधानया मूल्य मान्यतायात हाचां गायाः सर्वसत्तावादपाखे वनाच्वंम्ह प्रमं अज्याःगु निर्णय मयाइ धइगु विश्वास यायेत थाकु । संवैधानिक निकाय क्याप्चर यायेधुंकूम्ह प्रमं मेगु असंवैधानिक ज्या मयाइ धायेगु आधार मदु ।’
प्रतिनिधिसभा विघटन यासें न्हूगु निर्वाचनया तिथि क्वःछिउसां प्रम ओलीं पदं राजीनामा धाःसा बिउगु मदुनि । नापं राष्ट्रपतिं वय्कःयात ‘काम चलाउ सरकार’ धकाः घोषणा याःगु नं मदुनि । न्हापा न्हापा संसद विघटनया सिफारिस याःपिं प्रधानमन्त्रीपिं गिरिजाप्रसाद कोइराला, मनमोहन अधिकारी, शेरबहादुर देउवापिंसं सिफारिसया नापनापं पदं राजीनामा नं बियादीगु खः ।
LEAVE YOUR COMMENTS