नक्कली शरणार्थी काण्डं दलतय् दथुइ उथलपुथल, प्रहरीया ज्याय् हस्तक्षेप मयायेगु सहमति

येँ (नेपालभाषा टाइम्स)- नक्कली भुटानी शरणार्थी प्रकरणय् ल्हाः दुगु प्रमाण लूगु धासें पुलांम्ह गृहमन्त्री लिसें नेपाली कांग्रेसया केन्द्रीय दुजः बालकृष्ण खाँणयात म्हिगः प्रहरीं ज्वनेवं एमालें नं फरार जुयाच्वंम्ह थः केन्द्रीय सचिव लिसें सांसद टोपबहादुर रायमाझीयात अनुसन्धान ज्या क्वमचाःतलेया लागिं निलम्बन याःगु दु ।

एमाले महासचिव शंकर पोखरेलं म्हिगः छगू विज्ञप्ति पिकासें राज्यं याइगु अनुसन्धानय् ग्वाहालि जुइमा धकाः रायमाझीयात निलम्बन यानागु खँ धयादीगु दु । कार्यकर्तातय्सं रायमाझीयात निलम्बन यायेमाः धकाः पार्टीयात दबाब बियाच्वंगु खःसां एमालेया म्हीग च्वंगु सचिवालय बैठकं रायमाझीयात निलम्बन यायेम्वाःगु निर्णय याःगु खः । तर कांग्रेस नेता खाँणयात ज्वनेवं एमालेयात नं दबाब लाःगु खः ।

खाँणयात वय्कःया चाबहीया मैजु बहालस्थित छेँनं ज्वना यंकूगु खः । खाँणयात प्यन्हु तक कुनेगु अनुमति अदालतं बिउगु दु । लिसें प्रहरीं म्हिगः हे खाँणया सचिव नरेन्द्र केसीयात नं ज्वंगु दु ।

एमालें थ्व निर्णय यायेवं रायमाझीं म्हिगः सामाजिक सञ्जालय् थःगु धापू तसें थः विरामी जुयाः वासः याकाच्वनागु खँ धाःगु दु । तर थम्हं गन च्वनाः वासः याकाच्वनागु धइगु खँ धाःसा रायमाझीं धाःगु मदु । लिसें म्हिगः हे प्रहरीइ वये धकाः नं च्वयातःगु दु । रायमाझीं थः विरामी जुयाच्वंगु बारे म्हिगः संसद सचिवालययात नं पौ च्वयाः जानकारी याःगु खः । तर उगु पौ दर्ता धाःसा मयाः ।

मेखे थ्व प्रकरणय् नां वःम्ह कांग्रेसया केन्द्रीय दुजः लिसें सांसद डा. आरजु राणा देउवां थःगु नां स्वानाः फेक अडियो सार्वजनिक जूगु धासें छानविन यायेत माग यासें नेपाल प्रहरीया साइबर ब्युरोय् निवेदन बिउगु दु । उजुरीइ छुं सञ्चार माध्यम व सामाजिक सञ्जालय् सार्वजनिक जूगु अडियो नक्कली खः धासें आधुनिक प्रविधि छ्यलाः उकिया छानबिन यायेत इनाप यानातःगु दु ।

प्रहरीया ज्याय् हस्तक्षेप मयायेगु सहमति

भुटानी शरणार्थी प्रकरणय् प्रहरीं न्ह्याकाच्वंगु अनुसन्धानय् तःधंगु दलतय्सं छुं नं कथंया हस्तक्षेप मयायेगु धकाः सहमति याःगु दु । थ्व प्रकरणय् प्रहरीपाखें जोडतोडपूर्वक अनुसन्धान न्ह्याका यंकेवं थुकिया बारे सहलह यायेत म्हिगः तःधंगु स्वंगू दल कांग्रेस, एमाले व माओवादीया शीर्ष नेतातय् दथुइ सहलह जूगु खः ।

बैठक लिपा पत्रकारतलिसे खँ ल्हासें प्रधानमन्त्री लिसें माओवादी अध्यक्ष पुष्पकमल दाहालं आः प्रहरीं न्ह्याकाच्वंगु छानबिनया ज्यायात थःपिंपाखें छुं नं कथं डिस्टर्ब मयायेगु धकाः स्वंगू दल दथुइ सहमति जूगु खँ धयादीगु दु ।

वय्कलं धयादिल, ‘जिमिसं स्पष्ट कथं धयागु दु, दोषी छुटे मजुइमा व निर्दोष मलायेमा । प्रहरीया अनुसन्धानय् डिस्टर्ब याये मजिउ धइगु खँय् जिमि दथुइ सहमति जूगु दु ।’
वय्कलं मिडियाय् प्रचार जूथें स्वंगू दलया शीर्ष नेतात नापलायेगु ज्या मजूगु खँ नं धयादिल । प्रहरीं थ्व प्रकरणय् तीव्र रुपं अनुसन्धान न्ह्याकेवं थुकियात पनेगु लागिं तःधंगु दलया नेतात सक्रिय जुल धकाः नेपाली मिडियाय् प्रचार जुयाच्वंगु दु ।

बैठकय् दाहाल लिसें कांग्रेस सभापति शेरबहादुर देउवा, एमाले अध्यक्ष केपी ओली लिसें गृहमन्त्री नारायणकाजी श्रेष्ठ नं सहभागी जुयादीगु खः ।

मेखे गृहमन्त्री नारायणकाजी श्रेष्ठं थ्व प्रकरणय् अनुसन्धानं खंकूपिं सुयातं नं प्रहरी प्रशासनं मत्वःतीगु खँ धयादीगु दु । सिंह– दरबारय् पत्रकारतलिसे खँ ल्हासें
वय्कलं प्रहरी प्रशासनं निष्पक्ष ढंगं ज्या यानाच्वंगु खँ नं धयादिल ।

विज्ञ सूत्रतय्सं धाःकथं नक्कली भुटानी शरणार्थी प्रकरणय् प्रहरीं कडा रुपं कारवाहीया पलाः न्ह्याकेवं थीथी पार्टीया नेतातय् दथुइ थ्व प्रकरणयात छम्हं मेम्हेसित सिधयेकेगु ल्वाभःया रुपय् छ्यलेत्यंगु खः लाकि धकाः आशंका ब्वलंगु दु । खास यानाः प्रमुख प्रतिपक्षी एमालें थ्व प्रकरणयात एमाले विरुद्ध छ्यलेत्यंगु जुइमाः धकाः आशंका याःगु खः । लिसें कांग्रेसं नं उलि हे सशंकित जुयाः थ्व प्रकरणयात स्वयाच्वंगु खँ धाःगु दु ।

मेखे खाँणयात ज्वनेवं म्हिगः कांग्रेस सभापति शेरबहादुर देउवां पार्टीया शीर्ष नेतातय्त सःताः थ्व प्रकरणबारे सहलह ब्याकादीगु दु ।