दुरुया भाः थकाःगुलिं आपत्ति

येँ- राष्ट्रिय उपभोक्त मंचं दुरुया भाः थकाःगु खँय् कडा आपत्ति प्वंकुसे विरोध याःगु दु । मंचं वंगु छुं ई न्ह्यवंनिसें डेरी उद्योग व व्यवसायीतय्सं दुरुया भाः थकायेत बिया वयाच्वंगु दबावया दथुइ सरकारं दुरु प्रतिलिटरय् ६÷५२ पैसा दरं मूल्य वृद्धि यायेत सहमति बिउगु धासें विरोध याःगु खः ।

नेपाल सरकारया वंगु माघ १७ गते च्वंगु मन्त्रिपरिषद्या बैठकं दुरुया साविकया भावय् प्रति लिटर ६÷५२ पैसाया ल्याखं मूल्य वृद्धि यायेत दुग्ध विकास बोर्डयात अनुमति बिउगु धासें मंचं कडा रुपं उकिया विरोध याःगु खः ।

किसानं मीगु दुरुया भाः थकायेत मूल्यवृद्धि यानागु धाःसां नं सर्वसाधारणं विगतय् काये दयेमाःगु प्रतिलिटर ४९ तका दरं तकं काये मखंगु अवस्थाय् हाकनं खुतका दां बीगु धकाः किसानतयात झंग ल्हायेत स्वःगु व उपभोक्तायात महँगीया मार फयेत बाध्य याःगु मंचं जारी याःगु विज्ञप्तीइ धयातःगु दु ।

मंचया अध्यक्ष पे्रमलाल महर्जनं जारी यानादीगु विज्ञप्तीइ मूल्य वृद्धि कार्यान्वयन यायेत सरकारं दुग्ध विकास संस्थान लैनचौरयात निर्देशन बिउकथं माघ २८ गतेनिसें लागू जुइकथं संस्थानं प्रतिलिटर ९ तका वृद्धि यायेगु निर्णय याःगु गैर जिम्मेवारी व बदनियतपूर्ण जूगु धासें संस्थानया व्यवस्थापनयात आवश्यक कारवाही यायेत नं माग यानातःगु दु ।

मानव जीवनय् दैनिक उपभोग्य वस्तुया रुपय् दयाच्वंगु दुरु व दुरुं दयेकातःगु पदार्थय् सरकारया नीति निर्देशन अःखः निजी ख्यःया डेरी उद्योग संघ व नेपाल डेरी एशोसियसनं सरकार व संस्थानं क्वःछिनातःगु स्वयां नं छतका अप्वः भाः थकाःगु धासें उकियात कयाः घोर आपत्ति प्वंकाच्वना धकाः विज्ञप्तीइ धयातःगु दु ।

सम्बन्धित बुखँ

LEAVE YOUR COMMENTS