श्रमिकया मोबाइलय् कर मकाइगु

येँ (नेपालभाषा टाइम्स)- प्रधानमन्त्री पुष्पकमल दाहालं विदेशं लिहां वइपिं नेपाःमितय्त मोबाइल हयेत याःगु कडाई तत्काल लागू मयायेत निर्देशन बियादीगु दु । अर्थ मन्त्रालयं विदेशं लिहां वइपिं नेपाःमितय्सं छगः स्वयां अप्वः मोबाइल हल धाःसा भन्सार कायेगु निर्णय याःगु खः । तर सामाजिक सञ्जालय् थुकिया कडा आलोचना जुइवं प्रधानमन्त्री दाहालं म्हिगः अर्थमन्त्री बिष्णु पौडेलयात तत्काल निर्णय कार्यान्वयन मयायेत निर्देशन बियादीगु खः । सरकारं म्हिगःनिसें निर्णय कार्यान्वयन यायेगु तयारी याःगु खः ।

प्रधानमन्त्रीया निर्देशन लिपा तत्काल उगु व्यवस्था लागू मजुइगु जूगु दु । सरकारं छगः स्वयां अप्वः मोबाइल हल धाःसा १८ प्रतिशत कर कायेगु तयारी याःगु खः । विदेशं छगः मोबाइल हयेबलय् नं सरकारयात कर पुलेमाःगु धासें वैदेशिक रोजगारीइ वनाच्वंपिं नेपाःमितय्सं विरोध याःगु खः । उमिसं रेमिट्यान्स छ्वयाहयेगु बन्द यायेगु ख्याच्वः समेत बिउगु खः ।