ने. सं. ११४३ चौलाथ्व पारू -

फोहर व्यवस्थापनय् १५ व २२ वडायात नमूना दयेकीगु

येँ – येँ महानगरपालिकां १५ व २२ वडायात नमूना दयेकेगु तयारी जुयाच्वंगु खँ सीदुगु दु । येँ मनपाय् फोहोरया तःधंगु समस्या वःगुलिं उकियात म्हो यायेत निगू वडाय् नमूनाया रुपय् ज्या यायेगु तयारी जुयाच्वंगु खँ वातावरण विभागया प्रमुख हरिकुमार श्रेष्ठं ‘नेपालभाषा टाइम्स’ यात कनादीगु दु ।

छेँय् छेँय् उत्पादन जुयाच्वंगु फोहोर सतकय् वयाच्वंगुलिं फोहोरया समस्या जटिल जुया वनाच्वंगु धासें वय्कलं निगू वडाय् छेँखा पतिकं ध्वगिगु व ध्वमगीगु फोहोर तयेत बिस्कं बिस्कं डस्टविन इनेगु योजना दयेकाच्वनागु खँ नं वय्कलं कनादिल । फोहोर समस्या समाधान यायेगु धकाः साः दयेकेगु खँ जुयाच्वंसां नं ज्या जुया मच्वंगुलिं न्हापा निगुलिं वडा लिसे समन्वय यानाः ज्या न्ह्याकेगु तयारी जुयाच्वंगु खँ नं वय्कलं कनादिल ।

ध्वगीगु फोहोरयात मुनाः साः दयेकेगु ध्वमगीगु फोहोर पुनः प्रशोधन यायेगु ज्या यायेफत धाःसा येँ मनपाय् फोहोर उत्पादन म्हो जुइगु धासें आःयात निगू वडाया ज्या न्ह्याकेधुंकाः उकिया लिच्वः लिपा सुइनिगुलिं वडाय् विस्तार यायेगु जानकारी नं वय्कलं बियादिल । फोहोर उत्पादन जुइगु छेँय् हे फोहोर बिस्कं बिस्कं छुटे यायेगु ज्या जुल धाःसा उकियात व्यवस्थापन यायेगु ज्या अपुइगु खँ नं वय्कलं कनादिल ।

‘मनपाया बिस्कं बिस्कं गाडी फोहोर संकलन याइगु जूगुलिं उकियात व्यवस्थापन यायेत अपुइ, गुकिं यानाः गुलिखें फोहोर सिसडोल तक यंकेमालिगु अवस्था वइमखु ।’

डस्टबिनया निंतिं स्थानीय जनताया नं लगानी याकेगु कथं योजना दयेकाच्वनागु खँ कनादिसें वय्कलं स्थानीय जनताया लगानी जुइधुंकाः अपनत्व दइगु जूगुलिं थज्याःगु योजना दयेकागु खँ कनादिल । थौंकन्हय् येँ मनपाय् जक ५०० मेट्रिक टन फोहोर उत्पादन जुयाच्वंगु दुसा स्वनिगः न्यंकं १ हजार टन मेट्रिक टन फोहोर उत्पादन जुयाच्वंगु दु ।

स्मार्ट सिटी दयेकेत धेंधेंबल्लाः

येँ महानगरपालिकां सहरी योजना आयोगं स्मार्ट सहरी प्रविधि प्रतिस्पर्धा अवधारण हःगु दु । म्हिगः राष्ट्रियसभा गृहलय् जूगु ज्याझ्वलय् मेयर विद्यासुन्दर शाक्यं स्मार्ट सहरी प्रविधी प्रतिस्पर्धा २०७५ स येँ मनपाया समग्र विकासया निंतिं थीथी क्षेत्रया विज्ञपिंत आह्वान यायेगु खँ कनादिल । विशेष यानाः समुदाय व वातावरण, सहरी पूर्वाधार, महानगरीय सामुदायिक सेवा व महानगरया सार्वजनकि प्रशासन व व्यवस्थापन लगायतया गुंगू क्षेत्रय् थीथी उपक्षेत्र दयेकाः आइडिया आह्वान यायेगु खँ मेयर शाक्यं कनादिल । थ्व प्रतियोगिता अन्र्तगत समग्र विकासया निंतिं वातावरण सुधार, विपद व्यवस्थापन व दुर्घटना न्यूनीकरण, धू–कुँ नियन्त्रणलगायत महनगरया विकासया निंतिं फुक्कं विषय वस्तुइ समूह समूह दयेकाः प्रतिस्पर्धा याकीगु जूगु दु । बांलाःगु सुझाव बिउपिंत फुक्कं विधाय् यानाः मुक्कं १७ लाख तका पुरस्कार बीगु घोषणा नं म्हिगः याःगु खः ।