स्कुलया साइन बोर्डय् रञ्जना लिपि

येँ – येँ महानगरपालिका दुनेया फुक्क हे स्कुलया साइन बोर्डय् आः स्कुलया नां छगू रञ्जना लिपिं नं तये माःगु जूगु दु । वंगु वालय् च्वंगु महानगरपालिका शिक्षा समितिया मुँज्यां थ्व निर्णय याःगु खः ।

महानगरपालिकां थः मातहत लाःगु फुक्क हे सामुदायिक स्कुलय् छगू हे कथंया रंग पायेगु अभियान अन्तर्गत म्हासुगु व तुयूगु रंग पायेगु ज्या यानाच्वंगु दु । उकथं हे आः स्कुलया नां च्वइगु साइन बोर्डय् येँ देय्या पहिचान जुयाच्वंगु रञ्जना लिपि नं च्वकेगु खँ जूगु खः । वहे इलय् येँ मनपाया मेयर विद्यासुन्दर शाक्यं सामुदायिक स्कुलय् जक मखु सांगठनिक (निजी) स्कुलया साइन बोर्डय् नं रञ्जना लिपि तये माली धकाः न्ह्यथनादीगु प्रस्तावयात समितिया सकलें दुजःतय्सं स्वीकार याःगु खः ।

येँ मनपाया गुलिखे सामुदायिक स्कुलतय्सं आः हे थःपिनि नां च्वयेगु साइन बोर्डय् अंग्रेजी व देवनागरीया नापनापं रञ्जना लिपि छगू नं तयेगु याना हयेधुंकूगु दु । आः येँ मनपां निर्णय हे यानाः न्ह्याका यंकेगु तयारी याःगु खः ।

लुमंकेबहः जू, येँ मनपां थ्व स्वयां न्ह्यः मनपाया आर्थिक ग्वाहालिं सञ्चालन जुइगु साझा यातायात व नेपाल एम्बुलेन्स (१०२) य् नं रञ्जना लिपि तयेगु ज्या यायेधुंकूगु दु ।

अथे हे मनपां सुं नं निजी क्षेत्रया व्यापारीतय्सं थःपिनि पसः वा संस्थाया साइन बोर्डय् अंग्रेजी वा देवनागरीया नापं रञ्जना लिपि नं तल धाःसा साइन बोर्डया लागिं पुलीगु करय् ९० प्रतिशत मिनाहा यायेगु निर्णय याना तःगु दु ।

येँ मनपां नेपाल लिपि गुथिपाखें पिकाःगु रञ्जना लिपि सम्बन्धी सफू पिथनेत नं आर्थिक ग्वाहालि याःगु खः । रञ्जना लिपि स्वनिगःया म्हसीका जूगु कारणं नगरया पहिचान पिब्वयेगु लागिं नं थ्व लिपिया व्यापक छ्यलाबुला यायेमाःगु बिचाः भाषा एवं लिपिविद्तय्सं तयेगु यानाच्वंगु दु ।