विश्वकप पुलुपालु

मस्कोया मेस्सी केक

सम्भवतः थःगु लिपांगु विश्वकप म्हिताच्वंम्ह अर्जेन्टिनाया कप्तान लियोनल मेस्सीया ३१ दँ बुन्हि छगू हदतक ल्वःमंके मफइगु जुयाबिउगु दु। वंगु आइतवाः जून २४ कुन्हु मेस्सी ३२ दँ क्यन। रुसय् जुयाच्वंगु विश्वकप फुटबलय् समूह चरणया उपविजेता जुयाः अन्तिम १६ य् दुहां वनेत सफल अर्जेन्टिनाया कप्तान मेस्सीं थःगु बुन्हि अर्जेन्टिनी टीमनाप जानाः न्यायेकल।

अभ्यासया झ्वलय् हे मेस्सीं थःपासापिं नाप जानाः केक तानाः न्ह्यइपुक बुन्हि न्यायेकल।तर थ्व झ्वलय् विश्वकप जुयाच्वंगु रसियाया राजधानी मस्को नं मेस्सीया बुन्हिमय जुयाबिल। अर्थात मस्कों वयात छगू ‘सरप्राइज गिफ्ट’ बिउगु दु।मेस्सीं अर्जेन्टिनी टिम नाप बुन्हि हनाच्वंगु इलय् उखे मस्कोय् वयागु हे प्रतिमाया केक उपहार लःल्हाःगु खः।

रुसया राजधानी मस्कोय् चकलेट व केक दयेकेगु पेशा यानाच्वंपिंसं मेस्सीया बुन्हि धइगु सीका केकया प्रतिमा दयेकाः वयागु बुन्हिया लसता हंगु खः। छवाः न्ह्यवंनिसें हे मेस्सीया प्रतिमाया चकलेट केक तयार यानाच्वंगु खः। मस्कोया न्याम्ह केक निर्मातातय्सं दयेकूगु मेस्सी प्रतिमाया उगु केक ६० केजी तौलया खः। अर्जेन्टिनाया जर्सीइ १० नं. अंकित मेस्सी च्वयातःगु उगु केकय् ट्याटु व दा¥ही नापं तयातःगु दु।

अप्वः जुल, हाले मते !

खँ विश्वकप फुटबलया समूह चरणया लिपांगु कासाया खः। समूह बी लय् लाःगु पोर्चुगलं समूह चरणय् थःगु लिपांगु कासा इरान नापं म्हितल। तर कासा जुइ छन्हु न्ह्यः पोर्चुगलया कप्तान क्रिष्टियानो रोनाल्डो बांलाक द्यने मखन। रोनाल्डो बांलाक द्यने मखंगुया कारण इरान विरुद्धया कासा धाःसा मखु। तर कारण इरान हे खः।

समूह चरणया लिपांगु व मेगु चरणय् दुहां वनेगु निंतिं महत्वपूर्ण कासा रुपय् दयाच्वंगु पोर्चुगलं इरान नापं म्हिते माःगु खः। तर कासा छन्हु न्ह्यः रोनाल्डो च्वनाच्वंगु होटलया पिने ५० म्ह स्वयां अप्वः इरानी समर्थकत नं मुं वल।

इपिं सकलें रोनाल्डो च्वनाच्वंगु होटलया क्वथा पिनेसं च्वनाः, ततसलं म्येँ हालेगु, बाजं (ड्रमसेट) थायेगु, भुभुजेला बाजं पुइगु व मोटरया हर्न न्यायेकेगु ज्या चछियंकं धइथें यानाच्वन।

गुकिं यानाः रोनाल्डो बांलाक द्यने मखन। खतुं पोर्चुगल इरान विरुद्धया कासा न्ह्यः हे मेगु चरणय् दुहां वने धुंकूगु खः तर इरान धाःसा पोर्चुगलयात बुकाः मेगु चरणय् दुहां वनेगु आशाय् च्वनाच्वंगु खः।

उकिं इरानी समर्थकत पोर्चुगलया मुख्य कासामि रोनाल्डोया न्ह्यः स्यंकाः टिमयात ग्वाहालि यायेत स्वयाच्वंगु खः। इरानी समर्थकया अज्याःगु पहः खनाः दिक्क चाःम्ह रोनाल्डों अन्ततः बाध्य जुयाः ‘हाले मते अप्वः जुल।’ धायेमाःगु खः।

प्रतिबन्धं बचे जुल

निम्ह स्वीस कासामि सम्भावित प्रतिबन्धं बचे जूगु दु। सर्बिया विरुद्ध समूह चरणया निगूगु कासाय् गोल याःपिं निम्ह स्विस कासामि ग्रेन्ट जाका ज जेर्दान साकिरी सम्भावित प्रतिबन्धपाखें बचे जूगु खः।

सर्बिया विरुद्धया कासाय् जाका व साकिरीं गोल याःगु खः। वंगु शुक्रवाः जूगु कासाय् जाकां ५२ व साकिरीं ९० औं मिनेटय् गोल याःगु खः।

गोलया लसता हनेगु झ्वलय् इमिसं क्यंगु छगू व्यवहार विवादास्पद जूगु खः। गोलया लसता हनेगु झ्वलय् निम्हं कासामिं थःगु निपा ल्हातं इमा थेंज्याःगु आकार दयेकूगु खः।

गुगु आकार अल्बानियाया ध्वाँचय् दुगु प्रतिक चिं खः। निम्ह कासामिं गोलया लसता हनेगु झ्वलय् क्यंगु उगु संकेत राजनीतिक विरोध क्यनेकथंया जूगु धासें फिफाया अनुशासन कमिटीं छानविन तकं याःगु खः।

कमिटी छानविन लिपा तत्काल निम्हं कासामियात निगू निगू कासा प्रतिबन्ध तःगु खःसा उकियात वंगु सोमवाः हाकनं फुकुवा याना बिउगु खः। इमिसं याःगु व्यवहार राजनीतिक नियम व अपमानजनक सन्देश मजूगु ठहर यासें फिफां प्रतिबन्ध फुकुवा याना बिउगु खः। यद्यपि निम्हेसितं ७,६३२ पाउण्ड धाःसा जरिवाना पुइकूगु दु।