नेपाः टी–२० विश्वकपय् छनोट जुइ मफुत

एजेन्सी- नेपाः आइसिसी महिला टी–२० विश्वकपया ग्लोबल क्वालिफायरय् थाय् दयेकेत असफल जूगु दु । आइतवाः आइसिसी महिला टी–२० विश्वकपया एसिया छनोटया अन्तिम कासाय् घरेलु टिम युएइपाखेंं बुइवं नेपाःया न्हापांखुसी महिला टी–२० विश्वकप म्हितेगु म्हगस नं क्वचाःगु खः । अन्तिम कासाय् बांलाःगु रनरेटं त्याकेमाःगु दबाबय् दुगु नेपाःयात युएइं ४८ रनं बुकूगु खः । नेपाःयात बुकाः युएइ ग्लोबल क्वालिफायरय् छनोट जूगु दु । युएइ छनोटया छगू नं कासा बूगु मदु । नेपाः छनोटया न्हापांगु कासाय् हङकङलिसे बुगू खःसा स्वंगू कासा त्याःगु खः ।

दुबईया आइसिसी एकेडेमी मैदानय् जूगु छनोटया अन्तिम कासाय् युएइं बिउगु १२८ रनया लक्ष्य ज्वनाः मैदानय् वःगु नेपालं निर्धारित २० ओभरय् ७९ रन दयेकाः अलआउट जूगु खः । नेपाःया इन्दु बर्मां दकलय् अप्वः १५ रन दयेकूगु खःसा सीता राना मगरं १३ रन दयेकूगु खः । मेपिं कासामिपिंसं दोहोरो अंक तकं दयेकेमफुत ।

नेपाःयात कम रनय् अल आउट यायेगु झ्वलय् समैरा धारनीधारकं प्यंगू विकेट काःगु खः । अथेहे खुशी शर्मा व चामानी सेनेभिरन्तां निगू निगू विकेट कालसा चाया मुगलं छगू विकेट काःगु खः ।
टस बूगुलिं न्हापां ब्याटिङ याःगु युएइं निर्धारित २० ओभरय् न्यागू विकेटया क्षतिइ १२७ रन दयेकूगु खः । युएइया चामानी सेनेभिरन्तां सर्वाधिक ५२ रन दयेकूगु खःसा थिर्था सतिसं ४७ व कभिसा इगाडेगं २२ रन दयेकूगु खः । कासाय् नेपाःया कविता कुँवर निगू विकेट काःगु खः । अथे हे सीताराना मगर, सवनम राइ व संगीता राइ नं छगू छगू विकेट काःगु खः ।