इपिएलय् पोखरां ललितपुरयात बुकल

एजेन्सी- एभरेष्ट प्रिमियर लिग (ईपिएल) अन्तर्गत बुधवाः जूगु कासाय् पोखरा राइनोजं ललितपुर प्याट्रियट्सयात ९ विकेटं बुकूगु दु । निन्हु न्ह्यव निसें वयाच्वंगु वां याना आउटफिल्ड प्यानाच्वंगुलिं व कासा लिबाक शुरु जूगुलिं २० ओभरया कासायात ७ ओभर जक म्हितकूगु खः ।

न्हापां ब्याटिङ याःगु ललितपुरं निर्धारित ७ ओभरया कासाय् खुगू विकेटया क्षतिइ ५१ रन दयेकूगु खः । ललितपुरया निंतिं सन्दुन वीराक्कोडीं १९ रन, ओशाडा फर्नान्डों अविजित १० रन, नारायण जोशीं ११ रन, पवन सरार्फ ५ रन, अज्मातुल्लाह १ रन व कप्तान कुशल भुर्तेलं ३ रन दयेकूगु खः । पोखराया निंतिं नन्दन यादवं स्वंगू विकेट, बिक्रम सोबं निगू विकेट व केस्रिक विलियम्सं छगू विकेट काःगु खः ।

ललितपुरं बिउगु ५२ रनया लक्ष्य पोखरां ६ ओभर ३ बलय् छगू विकेटया क्षतिइ पुरा याःगु खः । पोखराया निंतिं रिचार्ड लेभीं २२ बलय् न्यागू चौका व छगू छक्का प्रहार यानाः अविजित ३८ रन दयेकूगु खः । अथे हे रित गौतमं १२ रन व साहन अराचिने अविजित १ रन दयेकल ।

ललिपुरया अज्मातुल्लाहं पोखराया छगू विकेट काःगु खः । पोखराया लिगय् थ्व न्हापांगु विजय खः । पोखरां न्हापांगु कासाय् भैरहवा ग्लाडियटर्सनाप वा वयाः प्रभावित जूगुलिं बराबरी चित्त बुझे यायेमाःगु खः । ललिपुुर धाःसा म्हितूगु निगुलिं कासा बूगु दु ।