पोल्यान्ड व रुस नं युरोकपय् छनोट

पोल्यान्ड व रुस युरोकपय् छनोट जूगु दु । आइतवाः चान्हय् जूगु कासाय् नर्थ मेसिडोनियायात २–० गोलं बुकाः पोल्यान्ड युरोकपया फाइनल चरणय् दुहां वंगु खः । अथेहे आइतवाः हे जूगु मेगु कासाय् साइप्रसयात ५–० गोलया शानदार जीत चूलाकुसें रुस नं युरोकपया फाइनलय् दुहां वंगु खः ।

पोल्यान्डया निंतिं फ्रान्कोवस्की व एर्काडियु मिलिकं छगू छगू गोल याःगु खः । थ्व निगुलिं गोलया निंतिं कप्तान रोबर्ट लेवान्डोस्कीं पास मिले यानाबीगु खः । कासाया ७४ औं मिनेटय् पोल्यान्डं फ्रान्कोवस्कीया गोलया ग्वाहालिं न्हापां अग्रता काःगु खः । थ्वयां खुगू मिनेट लिपा मिलिकं मेगु गोल याःगु खः । समूह एचय् पोल्यान्डं च्यागू कासा म्हिताः १९ अंक सहित शीर्षस्थानय् दु ।

मेखे समूह आई पाखें युरोकपय् छनोट जूगु निगूगु टिम जुइगु झ्वलय् रुसया निंतिं डेनिस चेरेसेभं निगू, मागोमेड ओजदोइभ, अर्टिम ज्यूभा व एलेक्सन्दर गोलोभिनं छगू छगू गोल याःगु खः । रुसयागु च्यागू कासा लिपा २१ अंकं थ्यंगु दु । थ्वयां न्ह्यव हे थ्व समूहं छनोट जुइधुंकूगु बेल्जियमया २४ अंकं दु ।

सम्बन्धित बुखँ

LEAVE YOUR COMMENTS