पशुपति लागाया पुनर्निर्माणय् पुरातत्व विभाग पंगः

येँ – तःभुखाचं क्षति जूगु पशुपति लागाय् आः तक नं पुनर्निर्माणया छुं हे ज्या न्ह्याये फयाच्वंगु मदुनि । पशुपति क्षेत्र विकास कोषं पुनर्निर्माणय् ध्यान मतःगुलिं पशुपति लागाया गुलिखे देगः व सतः पाःताः जुइधुंकूगु दुसा अन च्वंगु ऐतिहासिक महत्वया सामाग्री नं क्षति जुयाच्वंगु दु ।

अनया क्षतिग्रस्त विश्वरुप देगलय् पिनें तालं ग्वयातःगु दु । अनया पुजारीया कथं आः पुजा तकं पिने च्वनाः यायेमाःगु अवस्था दु । विश्वरुप देगः दयेकेगु निंतिं दातातय्सं चिउताः क्यंसां नं कोषं निर्णय मयाःगुलिं विश्वरुप देगः दयेकेगु ज्या न्ह्याके मफुगु द्वपं कोषया पुलांम्ह सदस्य सचिव गोविन्द टण्डनं बियादीगु दु ।

पशुपति लागाय् भुखाचं क्षति जूगु थासय् पुरातात्विक महत्वया सामान पिनेसं लानाच्वंगुलिं उकियात सुरक्षा बीत तकं थाकुयाच्वंगु खँ स्थानीय प्रहरीं धाःगु दु । देगःया सुरक्षाय् खटे जुयाच्वंम्ह प्रहरी सहायक निरीक्षक पासाडिकी शेर्पां देगःया गजू लिसें पुरातात्विक सामाग्री चीकूगु क्वथाय् बचे यायेत थाकुगु खँ कनादीगु दु । स्थानीय जनताया कथं आपालं देगःया आयस्ता मदुगुलिं कोषं वास्ता मयानाच्वंगु खः । तर कोषया सदस्य सचिव डा. प्रदीप ढकालं चालू आर्थिक दँय् विश्वरुप देगः पुनर्निर्माण जुइगु खँ कनादीगु दु ।

अथेहे जयबागेश्वरी देगःया पौ स्यनाच्वंगुलिं पालं त्वपुया तःगु दु । देगःया प्यखेरं चर्के जुयाच्वंगु दुसा त्वनाःसिँ व पःखाः दुनाच्वंगु दु । स्थानीय बासिन्दाया कथं देगः गुगुं नं इलय् दुना वयेफु ।

थुगु देगः दनेगु निंतिं २०७३ पुस १२ गते कोष व एड्भेन्चर सम्झौता जुइगु लिसें वंगु पुसं क्षमा पुजा यानाः ज्या न्ह्याकूगु खःसां नं कंक्रिट छ्यलाः पुनर्निर्माण यात धकाः स्थानीय जनतां विरोध यायेवं आः ज्या दिनाच्वंगु दु । सम्झौता कथं ज्या जूगु खःसा उगु देगः दनेगु क्वचायेधुंकीगु खः ।

अथेहे गौरीघाटया प्यंगू शिवालय व सतः दयेकेगु ज्या नं थाति लानाच्वंगु दु । उगु देगः व सतः दयेकेगु जिम्मा सम्पदाविद् रविन्द्र पुरीं काःगु खःसां पुरातत्व विभागं ड्रइङ डिजाइन स्वीकृत मयाःगुलिं ज्या दिनाच्वंगु दु । रविन्द्र पुरीं यदि पुरातत्व विभागं ड्रइङ स्वीकृत यात धाःसा कन्हय् कुन्हुंनिसें हे ज्या न्ह्याकेगु प्रतिवद्धता प्वंकादीगु दु ।

तःभुखाचं पशुपति लागाय् दुगु ५१८ सम्पदा मध्ये ९५ गू सम्पदा क्षति याःगु खः ।