मोहनीया इलय प्रहरीया एकीकृत सुरक्षा योजना

येँ (नेपालभाषा टाइम्स) – मोहनीया निंतिं प्रहरीया बिस्कं सुरक्षा योजना दयेकेगु तयारी याःगु दु। स्वनिगःया स्वंगू जिल्लायात घाकाः एकीकृत मंकाः सुरक्षा योजना दयेकेगु तयारी जुयाच्वंगु खँ धाःगु दु ।

स्वनिगःया प्रहरीया नेतृत्व यानाच्वंगु महानगरीय प्रहरी कार्यालय रानीपोखरीया कथं स्वंगुलिं जिल्लाया प्रमुखयात योजना दयेकाः पेश यायेत निर्देशन बिउगु दु। महानगरीय प्रहरी कार्यालय प्रमुख प्रहरी नायब महानिरीक्षक विश्वराज पोखरेलया कथं स्वंगुलिं जिल्लायात सुरक्षा योजना दयेकाः पेश यायेत निर्देशन बियागु खँ धयादीगु दु ।

मोहनि नखःया झ्वलय् गुगुं नं कथंया अप्रिय घटना मजुइमाः धकाः प्रहरी परिचालन यायेगु, शान्ति सुरक्षा बल्लाकेगु व कोरोना भाइरस न्यंके मबिइगु कथं योजना दयेकेत निर्दे शन बिउगु खँ सीदुगु दु। निर्देशन बीगु झ्वलय् प्रहरीया व्यवहार व इमान्दारिताय् चुके मजुइगु निर्दे शन बिउगु खः। निर्देशनया झ्वलय् लोभलाभया तमक्यंसे ज्या यायेत व प्रहरीया व्यवहारं आम सर्वसाधारण नागरिकया आत्मसम्मानय् घाः मलाइ कथं न्ह्यायेत स्वनिगःया प्रहरीयात सचेत याकूगु दु ।

पोखरेलया कथं थुगुसी नखःया झ्वलय् अप्रिय घटना पनेत, लोभलाभ मुक्त सेवा प्रवाह यायेत, व्यवहार बांलाकेत व कोरोना भाइरसपाखे सुरक्षित जुयाः मेपिं नं सुरक्षित यायेगुलिं केन्द्रीत जुइगु खँ कनादीगु दु। लिसे वय्कलं थुगुसीया मोहनि नखःया झ्वलय् प्रहरी कर्मचारी थःपिनिगु छेँय् वने फइगु अवस्था मदुगुलिं क्वय्या तहया प्रहरी कर्मचारीया नसात्वसाय् विशेष व्यवस्था यायेत नं मातहतया प्रहरी कार्यालययात निर्देशन बियादीगु दु ।

महानगरीय प्रहरी परिसर येँया कथं सुरक्षा योजना तयार जुइधुंकूगु दु। योजना येँ जिल्लाय् लागू यायेधुंकूगु दुसां नं मंकाः सुरक्षा योजना लागू यायेगु ल्यं दनिगु खँ परिसरया प्रमुख वरिष्ठ उपरीक्षक श्यामलाल ज्ञवालीं कनादीगु दु। थुगुसी न्हापा स्वयां अप्वः सतर्कता नालाः प्रहरीं तालिम बियातःपिं खिचायात नं छ्यलेगु तयारी जुयाच्वंगु दु। प्रहरीया कथं थुगुसी सुरक्षा सतर्कता नालेगु झ्वलय् अनुगमन यायेगु निंतिं ड्रोनं छ्यले फइगु खँ धाःगु दु ।