नेपाः साफया फाइनलय्

येँ- नेपाः साफ च्याम्पियनसीपया फाइनलय् थ्यंगु दु । बुधवाः सनिलय् जूगु कासाय् बंगलादेशयात १–१ गोलया बराबरीइ पनेत ताःलायेवं नेपाः फाइनलय् थ्यंगु खः । साफ च्याम्पियन्सीपय् नेपाः फाइनलय् थ्यंगु थ्व हे न्हापांखुसी खः ।

आइतवाः जूगु भारतविरुद्धया कासाय् ८२ औं मिनेटय् नःगु छगू गोल नेपाःयात उबलय् हे फाइनलय् वनेत पंगः जूगु खः, बुधवाः बंगलादेशविरुद्ध ८२ औं मिनेटय् हे फाइनलय् वनेगु लुखा चायेकाबिल । कासाया ८२ औं मिनेटय् बंगलादेशया गोलरक्षक जिकों नेपाःया कासामियात फल तयाबीवं वयात ह्याउँगु कार्ड नकल, थ्व लिपा बंगलादेश झिम्ह कासामिइ सीमित जुल ।

झिम्हय् सीमित जुइवं दबाबय् लाःगु बंगलादेशया रक्षकं कासाया ८८ औं मिनेटय् अञ्जन विष्टयात डिबक्सय् क्वःदयेकाबिल । थ्व लिपा वःगु पेनाल्टिइ बिष्टं हे गोल यासें कासा बराबरीइ हयेत ताःलात । थ्वयां न्ह्यः कासाया ९ मिनेटय् जक जूबलय् हे नेपालं छगू गोल नयेधुंकूगु खः ।

नेपालं आः फाइनलय् माल्दिभ्स वा भारतविरुद्ध वइगु शनिवाः म्हितीगु जुइ । भारत व माल्दिभ्स दथुइ बुधवाः बहनी ९ः४५ बजे कासा जुइ, थ्व कासा पाखें हे फाइनलय् वनीगु मेगु टिम ल्यइगु जुइ । फाइनलय् वनेगु निंतिं भारतयात कासा त्याके हे माःगु अवस्था दुसा माल्दिभ्सयात कासा बराबरी जक याःसां गाः ।

थुगुसी साफ न्यागू देशं जक ब्वति काःगुलिं राउण्ड रोबिनया आधारय् धेंधेंबल्लाः जूगु खःसा थौंया कासातकया अवस्था नेपाः शीर्षथासय् च्वनाः फाइनलय् थ्य.गु दु । उद्घाटन कासाय् हे माल्दिभ्सयात बुकूगु नेपालं श्रीलंकायात बुकाः व भारतपाखें पराजित जुयाः मुक्कं ७ ल्याः काःगु दु ।

सम्बन्धित बुखँ

LEAVE YOUR COMMENTS