रेलिङ्ग स्यंका थामय् न्याःवंगु कार दुर्घटनाय् छम्ह सित

येँ (नेपालभाषा टाइम्स) – शनिवाः चान्हय् थिमिइ छगः कार बांमलाक दुर्घटना जुइवं छम्ह सीगु दु । ख्वपं येँपाखे तसकं ब्वाका हःगु ८ च ४७५६ नम्बरया कार कौशलटारय् सतक दथुइ च्वंगु नँया रेलिङ्गयात त्वाःथलाः लँ सिथय् च्वंगु सिमेन्टया थामय् न्यांवंगु खः । दुर्घटनाय् लानाः येँ महानगरपालिका ४ वडा धुम्बाराहीइ च्वंम्ह स्वीदँया रिया श्रेष्ठ सीगु खः । उम्ह मिसा सिइवं गाडीइ च्वनावःपिं मेपिं स्वम्ह मिजंत धाःसा बिसिउँ वंगु खः । उमित नं आइतवाः सुथय् हे प्रहरीं ज्वनेधुंकूगु दु । प्रहरीं ज्वंपिं गाडी चालक लोकन्थलीया २६ दँया रञ्जित कार्की, थिमि राधेराधेया २६ दँया विजय देउजा व सूर्य विनायक नपा ४ वडाया २७ दँया सुदीप थापापिंत सामान्य घाःपाः जक जूगु खँ धाःगु दु । प्रहरीं थ्व घटनायात कयाः अनुसन्धान यानाच्वंगु खँ धाःगु दु ।