स्वयेबहपिं कासामि

एन्टोनियो ग्रिजम्यान, फरवार्ड, फ्रान्स

एन्टोनियो ग्रिजम्यान फुटबलप्रेमीतय् निंतिं न्हूगु नां मखु । फ्रान्सया थ्व फरवार्डं सन् २०१६ या युरोकपय् फान्सयात फाइनल तक थ्यंकेगु निंतिं महत्वपूर्ण भूमिका म्हितूगु खः । युरोकपय् दकलय् बांलाःम्ह कासामि ग्रिजम्यानं उबलय् खुगू गोल थ्वाःगु खः ।

थ्व विश्वकपय् नं वं अस्ट्रेलिया विरुद्ध न्हापांगु कासाय् हे गोल थ्वायेधुंकूगु दु । युरो २०१६ य् उत्कृष्ट कासामि जुयाः गोल्डेन बुट त्याकेत ताःलाःसां ग्रिजम्यानं थःगु देय्यात युरोकप धाःसा त्याकाबीमफुत ।

लियोनल मेसी, फरवार्ड, अर्जेन्टिना

थौं जुइगु अर्जेन्टिना व क्रोएसिया दथुया कासाय् न्ह्याबलें थें सकसिया मिखा लियोनल मेसी पाखे हे जुइगु जुइ । विश्वया उत्कृष्ट कासामि लियोनल मेसी थुगु विश्वकपया न्हापांगु कासाय् पेनाल्टि हे मिस याःगुलिं सकसिया आलोचनाया पात्र जुयाच्वंगु दु ।

अथे खःसां वयात स्वयेत सुनां नं त्वःफिके चाहे जुइमखु । क्लब फुटबलय् फुक्क कथंया उपाधी त्याकेधुंकूम्ह मेसी थःगु उपाधी धलखय् विश्वकप छगू नं थप यायेगु अभियानय् वयाच्वंगु दु ।

न्याक्वः तक विश्वया उत्कृष्ट कासामि जुयाः फिफाया बालन डी’ओर त्याकेधुंकूम्ह मेसीं अर्जेन्टिनाया निंतिं जक ६४ गोल यायेधुंकूगु दु । मेसीया प्रदर्शनया ग्वाहालिं वंगु विश्वकपय् अर्जेन्टिना फाइनल तक थ्यंगु खःसा कोपा अमेरिकाया नं फाइनल तक थ्यंगु खः ।