युरोपा लिग : बार्सिलोना अन्तिम १६ य्, डटमुन्ड आउट

एजन्सी- युरोपा लिग अन्र्तगत जूगु अन्तिम ३२ या निगूगु लेग कासाय् नापोलीयात बुकाः बार्सिलोनां लिगया अन्तिम १६य् थाय् दयेकूगु दु । बिहिवाः चान्हय् जूगु निगूगु लेग कासाय् बार्सिलोनां नापोलीयात ४–२ गोलं बुकूगु खःसा सम्रगय् ५–३ गोलं कासा त्याकाः अन्तिम १६ य् थाय् दयेकूगु खः । न्हापांगु लेग कासाय् छगू छगू गोलया बराबरीइ जूगु खः । बार्सिलोनाया निंतिं र्जोडी अल्बा, फ्रेन्क डे जोङ, जेरार्ड पिके व पिएरे एमरिक अबमेयाङं गोल याःगु खःसा नापोलीया निंतिं लोरेन्जा इन्साइन व माटेओ पोलिटानों गोल याःगु खः ।

लिगया मेगु कासाय् रेन्जर्सलिसे निगू निगू गोलया बराबरी म्हितूगु बोरुसिया डर्टमुन्ड सम्रगय् ६–४ गोलं पराजित जुयाः धेंधेंबल्लाखं पिने लाःवंगु दु । न्हापांगु लेगय् डर्टमुन्ड रेन्जर्सलिसे ४–२ गोलं बूगु खः । युरोपा लिगय् अन्तिम ३२ या कासा त्याकाः सेभिया, पोर्टो, एटलान्टा, आरबी लाइप्जिग, ब्रागा व रियल बेटिस नं अन्तिम १६ थ्यंगु दु ।

कासामि व समर्थकतपाखें युक्रेन आक्रमणया विरोध
युरोपा लिगया कासाया झ्वलय् क्लब, कासामि व समर्थकतय्स रुसं युक्रेनय् याःगु आक्रमणविरुद्ध विरोध प्रदर्शन याःगु दु । इटालियन क्लब एटलान्टां म्हिताच्वंम्ह युक्रेनया स्टाइकर रुस्लान मालिभास्कीं युरोपा लिगया कासा म्हितेधुंकाः थःगु टिसर्टय् ‘नो वार इन युक्रेन’ च्वयाः प्रदर्शन याःगु खः । बार्सिलोना व नापोलीया कासामितय्सं मंकाः कथं ‘स्टप वार’ या ब्यानर प्रदर्शन याःगु खः । अथेहे रुसी क्लब सेन्ट पिटर्सवर्ग व रियल बेटिसया कासाया झ्वलय् समर्थकतय्सं युक्रेनया ध्वाँय् प्रदर्शन याःगु खः ।

थ्व हे दथुइ युइएफएं रुसया सेन्ट पिटर्सवर्गय् यायेगु क्वछिनातःगु च्याम्पियन्स लिगया फाइनल अन मयाइगु जूगु दु ।

सम्बन्धित बुखँ

LEAVE YOUR COMMENTS