
एजेन्सी– पेनाल्टि सुटआउटय् इटलीपाखें पराजित जुइवं इंग्ल्यान्डया ५५ दँ लिपा तःधंगु अन्तर्राष्ट्रिय उपाधी त्याकेगु म्हगस छखे लाःगु खः । युरो कपया आइतवाः चान्हय् जूगु फाइनल कासाय् इटली पाखें पेनाल्टि सुटआउटय् ३–२ गोलं पराजित जुइवं इंग्ल्यान्डया म्हगस त्वाःदःगु खः ।
घरेलु मैदान वेम्बलेय् तःधंगु समर्थकतय् दथुइ जूगु कासाय् लुका सं कासाया निगूगु मिनेटय् हे गोल यासें इंग्ल्यान्डया म्हगसयात अझ क्वातुकाबिउगु खः । तर थ्वयां न्ह्यः ३३ गू कासा अपराजित म्हितावःगु इटलीयात त्याकेगु निंतिं थ्व छगू गोलं मगात । कासाया ६७ औं मिनेटय् लियोनार्डो बोनुचीं गोल यासें कासा बराबरी यानाबिल ।
थ्व लिपा नियमित इलय् निगुलिं टिमं गोल यायेमफुत । कासाया एक्स्ट्रा इलय् नं निगुलिं टिमं गोल यायेमफयेवं पेनाल्टि सुटआउट जुल । पेनाल्टि सुटआउटय् इंग्ल्यान्डया प्रशिक्षक ग्यारेथ साउथगेटयात हाकनं छक्वः भाग्यं साथ मबिल । इंग्ल्यान्डया न्यागू पेनाल्टि मध्ये स्वंगू असफल जुल । मार्कस रास्फोडं पोलय् बल थ्वातसा बुकायो स व जाडोन सान्चोया बलयात इटलीया गोलकिपर जिनालुइजि डोनारुमां पनाबिल । इंग्ल्यान्डया निंतिं ह्यारि केन व ह्यारि माग्वेयरं जक गोल यायेत ताःलात ।
इटलीया निंतिं डोमेनिको बेरार्डी, बानुची व फेड्रिको बेर्नाडेस्चीं पेनाल्टिइ गोल याःगु खः ।
इटलीं ५३ दँ लिपा युरो कप उपाधी त्याकूगु खः । थ्वयां न्ह्यः इटलीं सन् १९६८ य् छगू जक युरो त्याकूगु दु ।
LEAVE YOUR COMMENTS