मनपां झिगू थासय् सार्वजनिक चःबि दयेकीगु

येँ – येँ महानगरपालिकां थीथी थासय् सार्वजनिक चःबि दयेकीगु जूगु दु । येँ मनपां न्हापांगु चरणय् थीथी झिगू थासय् सार्वजनिक चःबि दयेकेत्यंगु खः । थगुने हे चःबि दयेकेगु तयारी याःगु खःसां आन्तरिक समस्याया कारणं चःबि दयेकेगु ज्यां मूर्त रुप काये मफयाच्वंगु खः । आः वयाः वइगु साउननिसें सार्वजनिक चःबि दयेकेगु येँ मनपां जानकारी बिउगु खः ।

येँ मनपाया सार्वजनिक निजी साझेदारी इकाइ प्रमुख महेश काफ्लेया कथं थगुने आन्तरिक समस्याया कारणं दयेके मफुगु सार्वजनिक चःबि आः वइगु साउननिसें निर्माण न्ह्याकेगु योजना येँ मनपाया दु । छगू चःबि दयेकेत म्होतिं नं प्यलाया ई काइगु व करिब १० गू लाख लागत तुइगु अनुमान येँ मनपां याःगु दु ।

न्हापांगु चरणय् अत्यावश्यक थासय् चःबि दयेकेधुंकाः वयांलिपा मेमेगु थासय् नं आवश्यकताकथं चःबि दयेका यंकेगु योजना दुगु येँ मनपां न्ह्यथंगु दु । येँ मनपाया मेयर विद्यासुन्दर शाक्यं ‘क्लिन द सिटी’ व सार्वजनिक चःबि निर्माणयात थःगु थःगु चुनावी घोषणापत्रय् हे न्हापांगु प्राथमिकता बियातःगु खःसां उकिं गति काये मफयाच्वंगु खः ।

सार्वजनिक चःबि दयेकेगु निंतिं थाय् मालाच्वंगु येँ मनपायात सतक विभागं नं येँया सतक जःखः थीथी पीनिगू थासय् सार्वजनिक चःबि दयेकेत स्वीकृति नं बीधुंकूगु दु ।