येँया पुलांगु नेवाः बस्तीइ ‘नो भेहिकल जोन’ दयेकेगु घोषणा

येँ (नेपालभाषा टाइम्स)÷येँ महा– नगरपालिकाया मेयर बालेन साहं येँया फुक्क हे भित्री लागाय् गाडी दुहां वये मदइ कथं ‘नो भेहिकल जोन’ दयेकेगु घोषणा यानादीगु दु । म्हिगः च्वंगु नगर परिषद्या बैठकय् मेयर साहं थुकिया सार्वजनिक घोषणा यानादीगु खः ।

वय्कलं यानादीगु घोषणा कथं आः येँया हनुमानध्वाखा लागा, न्हूसतक, असं, भोताहिति, लगं, खिचापुखू आदि येँ देय्या पुलांगु फुक्क हे नगर दुने सवारी साधन दुत हये दइ मखु ।

मेयर साहं वंगु छुं ई न्ह्यवंनिसें थ्वहे योजना लागू यायेगु ताः तयाः न्हूसतकय् पार्किङ चीकेगु, पेटी तब्या यानाः सतक चिब्या यायेगु थेंज्याःगु योजनात लागू याकेत स्वयाच्वंगु खः । तर म्हिगः धाःसा वय्कलं येँ देय्या प्राचीन लागा मुक्कंयात हे सवारी निषेधित क्षेत्र दयेकाः ‘पर्यटकीय क्षेत्र’ दयेकेगु थःगु योजना दु धकाः घोषणा यानादीगु खः ।

वय्कलं येँया वडा नं. ५ य् लाःगु प्राचीन नरः (हाडीगाउँ) लागायात नं पूवंक हे सवारी साधन निषेधित क्षेत्र घोषणा यायेगु योजना न्ह्यःने तयादीगु खः । थौंकन्हय् नरः लागाय् वालय् छन्हु सवारी साधन निषेध यानाः महोत्सव न्यायेकेगु ज्या यानाच्वंगु दु । थुकिया लिसें आः स्वयम्भू व बौद्ध लागायात नं येँ मनपा अन्तर्गत हयाः अन नं सवारी साधन निषेध यायेगु खँ नं कनादीगु खः ।

म्हिगः नगर परिषद्या बैठकय् वय्कलं थ्व प्रस्ताव न्ह्यःने तयादीगु खःसां येँया भित्री लागाया वडा अध्यक्षतय्सं उकी छलफल धाःसा याके मबिल । थुकिया बारे वृहत् सहलह आवश्यक दनि धासें छलफल न्ह्यःने न्ह्याके मबिउगु खः । मेयर साहं सार्वजनिक याःगु योजनाय् छु छु लागा पूवंक ‘नो भेहिकल जोन’ जुइ धइगु खँ धाःसा स्पष्ट यानातःगु मदुनि ।

थुकी येँ देय्या पुलांगु प्राचीन लागा फुक्क हे कःघाः धयातःगु जूगुलिं येँया भित्री लागाय् च्वंगु सघन वस्तीइ पूवंक हे सवारी साधन दुत यंके मजीगु जुइ ।

‘पुलांगु नेवाः बस्ती पूवंक हे ध्वस्त याइगु योजना खः थ्व’
येँया भित्री लागाय् सवारी साधन निषेध यायेगु थ्व योजनां येँया विशेष यानाः पुलांगु नेवाः वस्ती पूवंक ध्वस्त जुइ फइगु चिन्ता व्यक्त जूगु दु । येँ मनपा २२ वडाया अध्यक्ष चिनिकाजी महर्जनं मेयर साहया थ्व योजना लागू जुल धाःसा येँया नेवाः वस्तीया बजाः ध्वस्त जुइ फइगु ख्याच्वः बियादीगु दु ।

बालेन साहं आः तक गुलि नं थज्याःगु योजना हल, उकिं स्थानीय जनतायात गज्याःगु लिच्वः लाइ धकाः गबलें नं विश्लेषण मयाःगु कारणं न्ह्याबलें नं ‘ब्याक’ जुइ मालाच्वंगु खँ नं वय्कलं कनादिल । बालेन साहं थ्व स्वयां न्ह्यः कपनया खुसि चायेकेगु, तुखुचा चायेकेगु ज्या यानाः स्थानीय जनतायात सास्ती याःगु व लिपा अनं चिला वंगु खँ लुमंकुसें थ्व भेहिकल फ्रि जोनया ज्या नं छुं अध्ययन मयासे लहडया भरय् लागू याकेत्यंगु खँ कनादिल ।

थ्व योजना लागू यानाः थन दुने गाडी दुपिं मनूतय्त छु यायेगु, थनया बजाः छु यायेगु, स्थानीय मनूतय्त छु गज्याःगु सुविधा बीगु धकाः छुं हे अध्ययन मयाःगु जुयाः थ्व योजना येँया जनताया लागिं तःधंगु घातक जुइ फइगु खँ नं वय्कलं कनादिल । आः थुकियात कयाः सम्पूर्ण नेवाः खलः, पुचः, गुथि आदितय्सं पूवंक बिचाः याये माःगु व माल धाःसा महानगरपालिकाया ज्याकू हे घेरे यानाः जूसां थःगु धारणा तयेमाःगु खँ नं वय्कलं कनादिल ।

सम्बन्धित बुखँ

LEAVE YOUR COMMENTS