थौं डा. गिरीया सामान्य अन्त्येष्टि

येँ – जुजु महेन्द्रं ०१७ सालय् निर्वाचित सरकारयात ‘कू’ याःगु न्हिया जःखः लाकाः उगु ‘कू’ या डिजायनर मध्ये छम्ह जुयादीम्ह पुलांम्ह प्रधानमन्त्री डा. तुलसी गिरी मंत । वय्कः ९३ दँ दुम्ह खः । नेपाःया राजनीतिइ आपालं उथलपुथलं जाःगु घटनाय् आवद्ध जुयादीम्ह डा. गिरीं पुलांम्ह जुजु ज्ञानेन्द्रं याःगु ‘कू’ यात तकं साथ बियादीगु खः ।

संयोग धायेमाः, छगू इलय् कांग्रेसया महामन्त्री जुयादीम्ह वय्कः मदुगु इलय् येँय् कांग्रेसया महासमितिया बैठक समेत जुयाच्वंगु दु । तर कांग्रेसं उकी ध्यान धाःसा मतः । थौं पशुपतिइ सामान्य नागरिक सरह विद्युतीय शवदाह गृहय् वय्कःया अन्तिम संस्कार याइगु ज्याझ्वः दु । म्हिगः भुइजःसिइ च्वंगु वय्कःया छेँय् हे शवयात अन्तिम श्रद्धांजलिया लागिं तःगु खः ।

नेपाःया पुलांम्ह प्रधानमन्त्री समेत जूगुलिं वय्कःया अन्तिम संस्कारय् सलामी बीगु बारे म्हिगः सरकारं वय्कःया छेँजःयाके न्यंगु खःसां छेँजःपाखें सलामी कायेत अस्वीकार याःगु खँ सीदुगु दु । डा. गिरीं थःगु अन्तिम संस्कार सामान्य रुपं या धयाथकूगु खँ छेँजःपिंसं धाःगु दु ।