यल मनपापाखें ट्राफिक प्रहरीयात ग्वाहालि

यल (नेपालभाषा टाइम्स) – यल महानगरपालिकां न्यागू लख तका बराबरया ट्राफिक सामग्री महानगरीय ट्राफिक प्रहरी महाशाखायात लःल्हाःगु दु । यल मनपां दुर्घटनाय् म्होति हयेगु निंतिं महाशाखायात रबर कोन, डण्डी व ह्वली लक लगायतया सामग्री लःल्हाःगु खः ।

यल मनपा प्रमुख चिरिबाबु महर्जनं मशाखाया प्रमुखलिसें वरिष्ठ प्रहरी उपरीक्षक जनक भट्टराईयात २०० थान रबर कोन, १०० थान डण्डी व ३० गू ह्वली लक लःल्हानादीगु खः । मनपां बिउगु उगु सामाग्री यल महानगरया घोबिघाट, जावलाख्यः, एकान्तकुना, कुसुन्ती लगायतया थासय् तःगु दु । दुर्घटना म्हो यायेगु भाला महानगरपालिकाया नं जूगु धासें यल मनपा प्रमुख महर्जनं विद्यालय तहया विद्यार्थीतय्त नं ट्राफिक नियमया बार अध्ययन व अध्यापन याकेगु जानकारी बियादीगु दु ।

वय्कलं महानगरया सौन्दर्य अभिवृद्धिया निंतिं नगर दुने छरपस्ट जुयाच्वंगु तारयात म्हू चिइगु, चछि न्हिछिं जुयाच्वनीगु ट्राफिक जामयात व्यवस्थित यायेगु व महानगरया चक्रपथ लागाय् जुइगु सतक दुर्घटना म्हो यायेत सतक मत जडान यायेगु नापं आवश्यक ज्वलंया नं व्यवस्थापन यायेगु जुइ धयादिल । उगु इलय् महाशाखा प्रमुख भट्टराईं मनूतय् अप्वः हुल जुइगु व सवारी जाम जुइगु थासय् नगर प्रहरीयात सक्रिय रुपं व्यवस्थापन यायेत इनाप यानादिल ।

लुमंकेबहजू यल मनपां ट्राफिक व्यवस्थापनय् सहजता हयेगु ल्याखं नगर प्रहरीयात बाःछियंकंया तालिम बिया वयाच्वंगु दु ।

सम्बन्धित बुखँ

LEAVE YOUR COMMENTS