ने. सं. ११४४ ञलागा पारू -

भाषा, लिपिया संरक्षण यायेगु योजना दु : मेयर प्रजापति

ख्वप – ख्वप नगरपालिकाया मेयर सुनील प्रजापतिं लिपि व भाय्या संरक्षण यायेगु ख्वप नगरपालिकाया योजना दुगु खँ धयादीगु दु । मेयर प्रजापतिं नेपाल लिपि, नेपालभाषा व नेपाल संस्कृतिया संरक्षण, प्रवद्र्धन व विकासया निंतिं ख्वप नगरपालिकां लखौं तका दांया सिरपाःया व्यवस्था याना वयाच्वनागु नं धयादीगु दु ।

ख्वप मिडिया सर्कलया ग्वसालय् जूगु ख्वप सांस्कृति सनिल–२०७५या उलेज्या यासें वय्कलं उगु खँ धयादीगु खः । लिसें वय्कलं मौलिक संस्कृति, कला व आधुनिक विधायात च्वछायेगु निंतिं सिरपाःया व्यवस्था यानाः ज्या याना वयाच्वनागु दु धयादिल । ‘भैलःद्यः, विश्वय् हे नमूनाया रुपय् दयाच्वंगु ख्वप लाय्कूया न्यय्न्यापाःझ्याः बांलाकेत नं थःपिंसं लखौं तका दां विनियोजन यानाः फक्व सुधारया ज्या याना वयाच्वनागु दु’ प्रमुख प्रजापतिं धयादिल ।

ख्यालिजुजु मदनकृष्ण श्रेष्ठ विशेष पाहांकथं झायादीगु ज्याझ्वलय् वय्कःया काय यमन श्रेष्ठं ख्यालिन्हिलिं जाःगुनापं खय् भाय्या म्येँ न्ह्यब्वयादीगु खः । अथे हे ज्याझ्वलय् नांजाःपिं म्येँ हालामिपिं सत्यनारायण मानन्धर, लक्ष्मण पलिखेल, सुरजवीर वज्राचार्य, सतिस महर्जन, अनिता लोहला, सरिता प्रजापति, विष्णुसुन्दर देशय्मरुपिंसं थःथःगु सांगीतिक प्रस्तुति बियादीगु खःसा थीथी हुलाप्याखं नं न्ह्यब्वःगु खः ।

ज्याझ्वः ताःलाकेत थीथीकथं ग्वाहालि यानादीपिंत मेयर प्रजापति व मूपाहां ख्यालिजुजु श्रेष्ठं मतिनाया चिं व सुभाय् पौ लःल्हानादीगु ज्याझ्वलय् ब्यलि भ्वय्या नं व्यवस्था यानातःगु खः ।