कोरोना संक्रमणया कारणं गुल्मीया शिक्षक मन्त

येँ – कोरोना भाइरसया संक्रमण जुया बिहीवाः गुल्मीया छम्ह मिजं सीगु दु । कङे देउराली आधारभूत विद्यालयया प्रधानाध्याप सीगु पुष्टि स्वास्थ्य तथा जनसंख्या मन्त्रालयं याःगु दु । प्रदेश ५ सरकारया सामाजिक विकास मन्त्री सुदर्शन बरालं बिहीवाः सुथय् मदुगु पुष्टि यासें विज्ञप्ति पिथनादीगु दु । थ्व नापं संक्रमणया कारणं सीपिनि ल्याः स्वम्ह थ्यंगु दु ।

सोमवाः जक संक्रमणया पुष्टि जुम्ह ४१दँया उम्ह मनू रुपन्देहीया मणिग्रामया क्रिमसन अस्पतालय् जेठ १ गते भर्ना जूगु खः । आईसीयूलय् भेन्टिलेटरय् तयाः वासः याकाच्वंगु इलय् जक उम्ह मनूयात संक्रमणया पुष्टि जूगु खः । गुल्मी मदाने–६य् छेँ जुम्ह संक्रमित अस्पतालय् भर्ना जुइ न्ह्यःनिसें हे ज्वर वयाः मफयाच्वम्ह खः ।

थ्वस्वयां न्ह्यः सिन्धुपाल्चोकया बाह्रबिसेय् च्वम्ह २९दँया मिसा धुलिखेल अस्पतालय् मदुगु खःसा बाँके नरैनापुरया २५दँया मिजं क्वारेन्टाइनय् च्वनाच्वंगु इलय् मदुगु खः ।