सक्वय् धलं दनीपिंत स्वास्थ्य मापदण्ड अनिवार्य

येँ-  थुगुसी नं सक्वय् माधवनारायणया धलं दनीपिं व्रतालुतय्सं स्वास्थ्य मापदण्ड पूरा यायेमाःगु जूगु दु । वइगु पोहेलाथ्व पुन्हिनिसें लछियंकं न्ह्याइगु माधवनारायणया धलं दनीपिंसं स्वास्थ्य सुरक्षाया निंतिं पूवंकेमाःगु मापदण्ड क्वःछिउगु खः ।

श्री माधवनारायण स्वस्थानी व्रत तथा शालीनदी सुधार समितिया नकतिनि च्वंगु छगू मुँज्यां थ्व हे वइगु पोहेलाथ्व पुन्हि अर्थात मिला पुन्हिनिसें लछियंकं न्ह्याइगु माधवनारायणया धलं दनेत वइपिंसं पूवंकेमाःगु थीथी मापदण्ड क्वःछिउगु खः ।

कोरोना संक्रमण म्हो जूसां जोेखिम ल्यना हे च्वंगु व लिपांगु इलय् ओमिक्रोनया संक्रमण तच्वया वनाच्वंगु अवस्थायात ध्यानय् तयाः धलं दनीपिंसं अनिवार्य रुपं कोरोना भाइरस (कोभिड–१९) विरुद्धया खोप कायेमाःगु नापं कोभिग परीक्षणया रिपोर्ट नं दुथ्याकेमाःगु निर्णय याःगु दु । समितिं क्वःछिउगु निर्णयकथं कोरोना विरुद्धया खोप कयातःपिं, कोरोना परीक्षणय् रिपोर्ट नेगेटिभ वःपिं, निमोनियाया लक्षण मदुगु एक्स–रे रिपोर्ट नं अनिवार्य रुपं दुथ्याकेमाःगु जूगु दु ।

कोभिड परीक्षणया रिपोर्ट धलं दनेगु दिं स्वयां छुं दिं न्ह्याःया जुइमाःगु नापं १६ दँनिसें ६० दँतकयापिंत जक धलं दंके बीगु अर्थात व्रत च्वने बीगु निर्णय नं समितिं याःगु खः । समितिं उमेरया हदबन्दी तःसां नं ग्वःम्हेसित धलं दंके बीगु धइगु बारे धाःसा छुं निर्णय याःगु मदुनि ।
श्री माधवनारायणया धलं दनेगु निंतिं कजि ल्ययेगु व किसलिं छायेगु ज्या लिसें माःगु प्रक्रिया समितिं न्ह्याकेधुंकूगु दु । थ्व ल्याखं थुगुसी धलं दनेगु निंतिं केदार श्रेष्ठयात कजिकथं ल्यःगु दुसा वंगु पुस ७ गते किसलिं छायेगु ज्या नं जुइधुंकूगु दु ।

सम्बन्धित बुखँ

LEAVE YOUR COMMENTS