जितः फँसे यायेत्यन : प्रचण्ड

'परिवन्दय् लाकाः शीतनिवास यंकाः बदनाम यायेगु कुतः जुल'

येँ (नेपालभाषा टाइम्स) – नेकपाया अध्यक्ष पुष्पकमल दाहाल (प्रचण्डं) मेम्ह अध्यक्ष व प्रधानमन्त्री केपी ओलीं थःत फँसे यायेत्यंगु खँ धयादीगु दु । म्हिगः सुथय् हे माधव नेपाल, झलनाथ खनाल, नारायणकाजी श्रेष्ठ लिसें थःगु व नेपाल पक्षया नेतात लिसे खँल्हायेगु झ्वलय् वय्कलं थःत परिबन्दय् लाकाः शीतलनिवास यंकूगु खँ धयादीगु खः ।

शनिवाः बहनी आकाझाकां प्रधानमन्त्री ओली व प्रचण्ड राष्ट्रपति भवन शीतल निवास वनेवं निम्ह अध्यक्ष दथुइ ‘चोचोमोचो’ मिले जूगु आशंका यानाः माधव नेपाल लगायतया नेतातय्सं आलोचना यानाहःगु खः । थ्व हे कारणं सुथय् हे प्रचण्डयात नापलायेत खुमलटार वंपिं पम्पा भुासल, मातृका यादव, वर्षमान पुन लिसें माधव पक्षीय नेतात अष्टलक्ष्मी शाक्य, भीम रावल, रघुजी पन्त, बेदुराम भुसाल, युवराज ज्ञवाली लगायतया नेतातय् न्ह्यःने प्रचण्डं थःत मेम्ह अध्यक्ष ओली व महासचिव विष्णु पौडेलं फँसे यायेत स्वःगु खँ धयादीगु खः ।

वय्कःया कथं शनिवाः सचिवालय बैठक क्वचायेवं छेँय् लिहां वनेत्यंबलय् महासचिव पौडेलं एसएमए छ्वयाः प्रधानमन्त्री नापलायेगु इच्छा यानाच्वंगु खँ धयाहल । प्रधानमन्त्रीं नापलाये धाःगुलिं प्रधानमन्त्री क्वार्टरपाखे वन, तर अन प्रधानमन्त्री धाःसा मदु। अन हे ओलीं फोन याना हयाः शीतल निवास थ्यनेधुंकूगु व राष्ट्रपतिं सहलह याये धाःगुलिं छि नं अन हे झासँ धयाहल । राष्ट्रपतिं हे सहलह यायेधाःगुलिं खुमलटार लिहां वनेत्यंम्ह वय्कः तप्यंक शीतल निवास थ्यन । शीतल निवासय् न्हापा हे ओली लिसें पौडेल, जनार्दन शर्मा व शंकर पोखरेल थ्यनेधुंकूगु जुयाच्वन। अन पौडेल व जनार्दन शर्मां मंसिरय् महाधिवेशन यानाः वनेगु धयागु सहमतिया ड्राफ्ट तकं यायेधुंकूगु जुयाच्वन। तर प्रचण्ड थःत शीतल निवास सःताः बदनाम यायेत व अपमानित यायेत स्वःगु वाःचायेकाः सहमति मयासें लिहां वल ।

म्हिगः खुमलटारय् नेतातय्त ब्रिफिङ्ग यायेगु झ्वलय् प्रचण्डं थःत ओली व पौडेलं फँसे यानाः बदनाम व अपमानित यायेत स्वःगु धासें शीतल निवासं लिहां वँवं लँय्सं तुं थः स्वकिय सचिव जुयाच्वंम्ह म्ह्याय् गंगा दाहालयात धयाः थःम्हं छुं सहमति मयानानि धकाः फेसबुकय् स्टाय्टस तयेके बियागु खँ धयादीगु खः । दाहालं च्वयातःगु स्टाय्टसय् धयातःगु दु, ‘निम्ह अध्यक्ष दथुइ सहलह लिपा पार्टी सचिवालयया बैठकय् सहमति मालेगु थीथी विषयत (महाधिवेशन लगायत) बारे सहलह जूसां छुं नं विषयय् सहमति जूगु मदु व फुक्कं विषय सहलहया झ्वलय् हे दुगुलिं सुं नं भ्रमय् मलाये ।’

शनिवाः ओली लिसें प्रचण्डं नं शीतल निवास थ्यंगुलिं प्रचण्डं मंसिरय् महाधिवेशन यायेगु खँय् सहमति याःगु आशंका नेपाल पक्षय् नेतातय्सं याःगु खः । नेता नेपालं उकुन्हु हे यदि थथे जुल धाःसा थः थुकिया विरोधय् राष्ट्रिय अभियानय् वनेगु खँ धयादीगु खः ।

खुमलटारय् ब्रिफिङ्गया झ्वलय् प्रचण्डं थः ओली नाप मिले मजुयागु स्पष्टिकरण बिसें महाधिवेशनया प्रस्तावयात कयाः थःम्हं आलोचना यायेमफुगु व नरम जुयाः प्रस्तुत जुयागु हे थःगु कमजोरी जूगु खँ धासें थःम्हं ओली लिसे छुं नं सहमति मयानिगु खँय् ढुक्क जुइत धयादीगु खः ।

ओलीं छगू लिपा मेगु तुरुप कार्ड हयाच्वंगु, तर छुं नं विश्वास याये लायकयागु मजूगु धासें प्रचण्डं थः पासापिनिगु सुझाव व भावना कथं हे न्ह्याः वनेगु खँ नं उगु भेलाय् धाःगु खः । थ्वहे दथुइ प्रचण्ड प्रधानमन्त्री नापलायेत म्हिगः हाकनं बालुवाटार झायादीगु दु ।