ने. सं. ११४४ कछलागा तृतीया -

अख्तियारया छापायात कयाः आपत्ति

येँ – प्रदेश २ या मुख्यमन्त्री लालबाबु राउतं सरकार प्रमुखया ज्याकुथिइ छापामार शैलीं वयाः अख्तियार दुरुपयोग अनुसन्धान आयोगं फाइल नियन्त्रणय् काःगु घटनायात कयाः आपत्ति प्वंकादीगु दु । वय्कलं अख्तियारया तरिका पाय्छि मजू धासें आयोग प्रमुख प्रेम राईयात नं फोन यानादीगु खः ।

बुधवाः हे छगू पत्रकार सम्मेलन यासें राउतं अख्तियारया शैलीयात कयाः आपत्ति प्वंकूसें धयादिल, ‘मुख्यमन्त्री प मन्त्रिपरिषदया ज्याकू छगू प्रदेशया कार्यकारी प्रमुखया ज्याकू खः, फाइल फ्वनेगु नं छगू तरिका दइ ।’

मुख्यमन्त्री राउतं सुशासनया सवालय् थः खुल्ला दुगु धासें धयादिल, ‘साइकल न्यायेगुलिइ गनं नं अनियमितता जूगु दुसा कारबाही यायेत जिं ग्वाहालि याये, तर छगू संस्थायात हे बदनाम यायेगु कथं अख्तियारं याःगु छापामारी सह्य जुइ मखु ।’

‘मुख्मयन्त्री बेटी पढाउ, बेटी बचाऊ’ अभियान अन्तर्गत न्याःगु साइकलय् कम्पनीया नां तकं मदुगु व भाः नं बिस्कं बिस्कं जुइवं अख्तियारं बुधवाः छापा मारे याःगु खः । थ्व अभियानया निंतिं मुख्यमन्त्रीया ज्याकुथिं निगू चरणय् यानाः २७ हजार २६२ गू साइकल न्याःगु खः । न्हापांगु चरणय् न्याःगु साइकलया भाः ६ हजार ४३२ तका तूगु खःसा लिपांगु चरणय् न्याःगु साइकलया भाः ८ हजार ४४६ तका तूगु खः ।

राउतं २० गते विश्वासया मत काइगु
येँ – प्रदेश २ या मुख्यमन्त्री लालबाबु राउतं असोज २० गते विश्वासया मत काइगु जूगु दु । जनता समाजवादी पार्टी कुचा दलाः लोकतान्त्रिक समाजवादी दल गठन जुइवं राउतं विश्वासया मत कायेगु तयारी याःगु खः । प्रदेशय् जसपाया ५५ म्ह सांसद दुगु खःसां झिंखुम्हेस्यां लोकतान्त्रिक समाजवादी पार्टी ल्यःगु खः ।

म्हिगः च्वंगु प्रदेशया मन्त्रिपरिषदया बैठकं प्रदेशसभाया अधिवेशन सःतेगु निंतिं प्रदेश प्रमुखयात सिफारिस याःगु खः । राउतया पक्षय् बहुमत दुगुलिं याउँक हे वय्कलं विश्वासया मत काइगु जूगु दु । प्रदेशय् राउतया पक्षया ३९ सांसदपिं दु ।