नेवाःयात हेपे याःपिं विरुद्ध उजुरी

येँ (नेपालभाषा टाइम्स)- थौंकन्हय् अतिकं लोकं ह्वानाच्वंम्ह गायक कुमाः सागरया म्येयात नेवाः लवज पिकयाः अपमानपूर्वक हालाः क्यंपिं स्वम्ह हास्य कलाकार व उमिगु उगु शो प्रदर्शन याःम्ह छम्ह युट्युब सञ्चालक विरुद्ध म्हिगः येँया जिल्ला प्रहरी कार्यालयय् उजुरी दर्ता जूगु दु ।

स्वनिगःया थीथी थासं मुं वःपिं नेवाः अभियन्ता–तय्सं कुमाः सागरया म्येयात माध्यम दयेकाः नेवाः भाय् व संस्कृतियात अपमान याःगु धासें युट्युब सञ्चालक सुशान्त प्रधान व हास्य कलाकारपिं सजन श्रेष्ठ, उत्सव सापकोटा व सुजन जिम्बा विरुद्ध म्हिगः येँया जिल्ला प्रहरी कार्यालय परिसर भद्रकालीइ किटानी जोहरी बिउगु खः ।

थिमिया जीवपति श्रेष्ठ लगायत आपालं नेवाः अभियन्तातय्सं निवेदन पतिइ हस्ताक्षर यानातःगु दु । उगु निवेदनय् विपक्षीतय्सं नांजाःम्ह गायक कुमाः सागरया बेइज्जत यायेगु लिसें नेवाः समुदाययात हे प्रहार याःगु जुयाः उमित कानुनी कारवाही यायेमाः धकाः इनाप यानातःगु दु । निवेदनय् अभियन्तापिं रवि शाक्य, सन्जय शाक्य, शैलेश शाक्य, विराज राजोपाध्याय, सुदयराज शिलाकार आदिपिंसं नं हस्ताक्षर यानातःगु दु ।

अभियन्ता श्यामकृष्ण प्रजापतिं ‘नेपालभाषा टाइम्स’ यात कनादीकथं म्हिगः प्रहरी परिसरय् निवेदन दर्ता जुइवं प्रहरीं विपक्षीयात फोन याःगु खः । तर प्यम्ह मध्ये सुं छम्हेस्यां हे फोन मल्ह्वं । आः प्रहरीं उमित हानं स्वापू तयाः परिसरय् सःतेगु व मवल धाःसा ज्वं वनेगु खँ धाःगु दु । वयांलि निगुलिं पक्षयात सःताः खँल्हाबल्हा यायेगु खँ प्रहरीं धाःगु दु ।

विपक्षीतय्सं कुमाः सागरया म्येयात नेवाः लवज पिकयाः हालाः उकी अश्लील अर्थ पिकयाः अपमान याःगु खः । उमिगु थ्व भिडियो सार्वजनिक जुइवं सामाजिक सञ्जालय् उमिगु विरुद्ध व्यापक रुपं पोष्ट जुयाच्वंगु दु । थःपिनिगु कडा विरोध जुइवं सुजन श्रेष्ठं क्षमा फ्वनाः छगू भिडियो नं तःगु दु ।