डोजर ल्वापुइ सहमति

येँ – थनया धोबीघाटय् स्थानीय सुमन महर्जनया छेँय् डोजर चले याःगु विषयय् स्थानीयवासी व सडक विस्तार संघर्ष समिति दथुइ म्हीग जूगु ल्वापु सहमति यानाः ज्यंकूगु दु । म्हिगः सानेपाया प्रहरी चौकीइ निगुलिं पक्ष च्वनाः सहमति यानागु खँ उगु घटनाय् लानाः घाःपाः जूम्ह सुरज महर्जनं ‘नेपालभाषा टाइम्स’ यात कनादिल ।

डोजरं थुना बिउगु पःखाः हानं दना बीगु, उगु पःखाः बारे अदालतय् न्ह्यानाच्वंगु मुद्दां छु फैसला यात उकियात माने यायेगु लिसें लुटे याना यंकूगु भाजु महर्जनया मोबाइल नं निन्हुया दुने लित बीगु सहमति जूगु खँ वय्कलं कनादिल ।

उखे यलया वटुक भैरवय् नं डोजर हयाः थुना बिउगु देगःया पःखाः वटुक भैरव संरक्षण समितिं हानं दनेगु सुरु याःगु दु । थुकिया बारे अन हानं वार्ता जुइत्यंगु खँ नं सीदुगु दु ।