हाकुपतासि सिनाः येँनिसें बैंकक यात्रा

येँ – हाकुपतासियात नेवाः वसः धकाः सकस्यां माने ला याः तर थ्वहे वसः पुनाः विदेश यात्रा थेंज्याःगु ज्या धाःसा सुनां नं याःगु खइ मखु । नेवाः आन्दोलनया युवा अभियन्ता लिसें एलजीबीटीआई अभियानया कार्यकर्ता रुक्साना कपाली छुं ई न्ह्यः थाइल्याण्डया राजधानी बैंककय् जूगु किशोरतय् छगू ज्याझ्वलय् ब्वति कायेत उखे झाःगु खः । उगु यात्राय् वय्कः यलया थःगु छेँनंनिसें बैंकक थ्यंकं हे हाकुपतासि सिनाः झाःगु जुयाच्वन । थथे हाकुपतासि सिनाः बैंकक वनाबलय् लँय् मनूतय्सं गज्याःगज्याःगु प्रतिक्रिया बिल ले धइगु बारे वय्कलं आः नकतिनि थःगु ब्लगय् च्वयादीगु दु । हाकुपतासि सिनाः यात्रा यानाबलय् लँय् फुकस्यां थःत अजूचायाः स्वःगु व गुलिस्यां ला ‘डान्स कार्यक्रम दु लाकि छु ?’ धकाः न्यंगु खँ वय्कलं च्वयादीगु दु ।

वय्कलं च्वयादी विमानस्थलय् थःगु वसः खनाः सुरक्षाकर्मीं भचा अप्वः जाँचे याःगु व विमानय् च्वंपिं मेपिं यात्रुतय्सं नं घुरे जुयाः स्वःगु जुयाच्वन । बैंकक थ्यनेधुंकाः धाःसा सुनां नं खास वास्ता मयाः । बरु अन हे च्वंपिं नेपाली कर्मचारीतय्सं ‘थ्व छु वसः पुना वयागु हाँ ?’ धकाः न्यंगु जुयाच्वन । थःगु थ्व अनुभव बारे वय्कलं च्वयादी – नेवाः वसःयात अन्तर्राष्ट्रियकरण यायेगु खँ ला झीसं ल्हानाच्वना, तर वहे वसः पुनाः अन्तर्राष्ट्रिय ख्यलय् वनेगु ज्या धाःसा गुलि याना ? वास्तवय् परम्परागत वसः पुनीपिं मनूतय्त चीधंगु दिमाग दुपिं धकाः सोचे याइगु चलनयात हाथ्या बीत नं जिं थ्व वसः पुनाः विदेश यात्रा यानागु खः ।