येँ -नेपाल विद्युत प्राधिकरणया कार्यकारी निर्देशक कुलमान घिसिङया नियुक्ति खारेज यायेमाःगु माग यासें निवर्तमान कार्यकारी निर्देशक हितेन्द्रदेव शाक्यं सर्वोच्च अदालतय् रिट तयादीगु दु ।
वय्कलं थःत गैरकानुनी रुपं प्राधिकरणया कार्यकारी निर्देशक पदं चीकूगु दावी यासें उकियात बदर यानाः थःत न्हापाया हे थासय् तयेमाःगु माग यानादीगु दु ।
वय्कलं प्रधानमन्त्री तथा मन्त्रिपरिषदया ज्याकू, ऊर्जा मन्त्रा– लय, ऊर्जामन्त्री, नेपाल विद्युत प्राधिकरणया सञ्चालक समिति व कार्यकारी निर्देशक कुलमान घिसिङयात विपक्षी दयेकाः रिट तयादीगु खः । उकथं हे वय्कलं थःत राजीनामा बीत दबाब बिउगु तर थम्हं राजीनामा मबियागु धासें थःत जल तथा ऊर्जा आयोगया ऊर्जा विशेषज्ञ दुजः पदय् नियुक्त यायेगु सरकारया निर्णय गलत जूगु दावी नं यानादीगु दु ।
वय्कलं सरकारं थःत नियुक्त याःगु पद थम्हं अस्वीकार यानागुलिं प्राधिकरणया कार्यकारी निर्देशक पदय् थःगु हक कायम हे जुयाच्वंगु दावी नं यानादीगु दु ।
थम्हं राजीनामा मबियागु अवस्थाय् थःत खँ तयेगु ह्वःताः तकं मबिसें पदं चीकेगु ज्या गलत जुइ धासें वय्कलं कार्यकारी निर्देशक पदय् थःगु हक कायम जुइगु दावी यानादीगु खः । वय्कलं थःत चीकेगु सरकारया निर्णय, घिसिङयात कार्यकारी नियुक्त याःगु निर्णय बदर जुइमाःगु माग यानादीगु दु ।
उकथं हे वय्कलं थः प्राधिकरणया कार्यकारी निर्देशक पदय् दुगु हे अवस्थाय् घिसिङयात नं उगु हे पदय् नियुक्त याःगु दावी यासें निर्णय खारेज यायेमाःगु माग नं यानादीगु दु ।
LEAVE YOUR COMMENTS