मन्त्री व स्वनिगःया मेयर दथुइ सहलह
येँ(नेपालभाषा टाइम्स)÷स्वनिगःया पर्यटन पुनरुत्थानया निंतिं संघीय सरकार व स्थानीय सरकार दथुइ सहलह जूगु दु । संघीय सरकारं स्वनिगःया पर्यटन पुनरुत्थानया निंतिं स्वनिगःया नगर प्रमुखलिसे सहलह ब्याकूगु खः ।
संस्कृति, पर्यटन तथा नागरिक उड्डयन मन्त्री जीवनराम श्रेष्ठं स्वनिगःया पर्यटन पुनरुत्थानया निंतिं स्वनिगःया स्थानीय तहपाखें मंकाःकथं प्रतिवद्धता प्वंकाः ज्या यायेमाःगु आवश्यक दुगु खँ सहलहया इलय् धयादीगु दु । मन्त्रालयपाखें स्वनिगःया पर्यटन ख्यःया पुनरुत्थानया निंतिं चिउताः प्वंकाच्वंगु धासें मन्त्री श्रेष्ठं स्वनिगःया महानगर व नगरलिसे याये फइगु समन्वययात कयाः सहकार्य न्हापांगु शर्त जुइमाःगु खँ धयादीगु दु ।
सहलहया इलय् येँ महानगर प्रमुख बालेन्द्र शाह (बालेनं) पर्यटन व्यवस्थापनय् एकीकृत योजना व सरोकारवाला निकायया दथुइ समन्वयया अभाव जुयाच्वंगु खँ धयादीगु दु । जात्रा, पर्व, नखःचखःया इलय् देगलय् जक मखसे सतकय् नं रंग पानाः आकर्षण अप्वयेकेमाःगु वय्कलं धयादीगु दु । सिटी ब्राण्डिङ याःसा जक पर्यटक नं अप्वइ धासें वय्कलं थ्वपाखे धाःसा ध्यान बिउगु खने मदु धयादिल । लिसें वय्कलं अन्तर्राष्ट्रिय स्तरया कलाारत व कासामित हयाः सिटी ब्राण्डिङ याये फइगु सुझाव नं वय्कलं बियादीगु खः ।
यल महानगर प्रमुख चिरिबाबु महर्जनं स्वनिगःया स्थानीय तहया प्रमुखतय्सं फोहर व्यवस्थापन, सहरी सेवा व सुविधा वितरण यायेगु खँय् ध्यान बीमाःगु व नापं पूर्वाधारय् एकीकृत योजना हयेमाःगु खँय् बः बियादिल ।
लिसें वय्कलं सांस्कृतिक, ऐतिहासिक व पुरातात्विक स्थलयात स्वाइगु पदमार्ग निर्माण, साइकल लेन व मेमेगु पर्यटन पूर्वाधार निर्माणय् नं सहकार्य याना वने पइगु खँय् बः बियादिल ।
सहलहय् ब्वति कयादीपिं थीथी नगरपालिकाया प्रमुखतय्सं पर्यटकया निंतिं सार्वजनिक चःबि, विश्राम कक्ष, विद्युतीय बस संचालन, स्वनिगःया ऐतिहासिक सम्पदास्थलय् पर्यटकया सुविधाया निंतिं एकद्वार प्रवेश अनुमति, पर्यटक बसपार्क व रात्रीकालीन पर्यटन लगायत थीथी विषयय् सहलह ब्याकूगु खः ।
सहलह ज्याझ्वलय् येँ महानगर प्रमुख शाह, यल महानगर प्रमुख महर्जनलिसें ख्वप नगरपालिकाया सुनिल प्रजापति, तोखा नगरपालिकाया प्रकाश अधिकारी, दक्षिणकाली नगरपालिका प्रमुख मोहन बस्नेत गोदावरी नगरपालिका प्रमुख गजेन्द्र महर्जन लगायतया उपस्थिति दुगु खः ।
LEAVE YOUR COMMENTS