सर्जक व सृजना निगूगु ब्वय् मथुरा सायमि

किपू (नेपालभाषा टाइम्स)- नेपालभाषा एकेदेमिया ग्वसालय् जुयावयाच्वंगु सर्जक व सृजनाया निगूगु ब्व शनिवाः एकेदेमिया हल किपुली जुल । थ्व पालय्या ज्याझ्वलय् वरिष्ठ आख्यानकार मथुरा साय्मिया सृजना व वय्कःया बारे चर्चापरिचर्चा जूगु खः ।

एकेदेमिया भाइस चान्सलर मल्ल के सुन्दरपाखें ज्याझ्वः बारे जानकारी बिसें न्ह्याःगु ज्याझ्वलय् प्रा. प्रेमशान्ति तुलाधरं आख्यानकार साय्मिया जीवनबारे कुलादीगु खःसा साहित्यकार डा. रिना तुलाधरं साय्मिया लिपांगु थीथी उपन्यासयात कयाः न्ववानादीगु खः ।

ज्याझ्वलय् न्ववासें आख्यानकार साय्मिं थःगु न्हापांगु बाखं ‘व वइ तिनि’ अन्तरक्याम्पस नेपालभाषा साहित्य धेंधेंबल्लाखय् न्हाप लाःगु खँ लुमंकुसें तर व बाखं बांलाकेगुली थःगु जक मखु जनकवि दुर्गालाल श्रेष्ठया नं तःधंगु ल्हाः दुगु खँ धयादिल ।

‘उबलय् थ्व बाखं पिहां वयेधुंकाः समालोचक डा. कमलप्रकाश मल्लं धाःगु खः कि आः नेपालभाषाया बाखं विधाय् न्हू धारया बाखं च्वइम्ह बाखं च्वमि कथं मथुरा साय्मि न्ह्यःने वःगु दु । उबलय् जिं छुं धायेमफुत, तर आः धाये, ‘थ्व बाखनय् जि जक मखु दुर्गालाल नं दु ।’

अथेहे बाखंच्वमि साय्मिं मिसा उपन्यासकारतय्त हःपाः बियाः उपन्यास च्वकूगु ज्यायात च्वछासें जनकवि दुर्गालाल श्रेष्ठं धयादिल, ‘ल्वचं यानाः ख्वाः हय्कूसां वय्कःया सृजनां न्ह्याबलें ल्याय्म्ह यानातःगु दु । अझ मिसापिंत नं उपन्यास च्वकेगु ज्या यानाः वय्कः झन ल्याय्म्ह जूगु दु ।’

ज्याझ्वलय् आख्यानकार साय्मिया थीथी बाखं वय्कः थःम्हं हे लिसें प्रतिसरा साय्मि, शाक्य सुरेनपिंसं ब्वनाः न्यंकादीगु खः । अथेहे साहित्यकार शरद कसानं वय्कःया हे बारे च्वयादीगु बाखं न्यंकूगु खः । अथेहे लोककवि राजभाई जकःमिं वय्कःयात कयाः च्वयातःगु चिनाखँ न्यंकादिलसा वीर प्रसाद भन्सारीं मदुम्ह साहित्यकार गोविन्द श्रेष्ठं च्वयादीगु म्येँ न्यंकादीगु खः । अथेहे हुलाप्याखं नं न्ह्यब्वःगु खः । ज्याझ्वलय् मदुम्ह साहित्यकार श्रेष्ठया लुमन्तिइ मौन धारण नं याःगु खः ।

एकेदेमिया चान्सलर यज्ञरत्न धाख्वाःया सभापतित्वय् जूगु ज्याझ्वलय् सदस्यसचिव पुष्पराज राजकर्णिकारं लसकुस यानादीगु खःसा ज्याझ्वःया संयोजक त्रिरत्न शाक्यं सुभाय् देछायादीगु खः ।