सक्वय् धलं दनाच्वंपिनि परदेश यात्रा शुरु

येँ सक्वय् शालीनदीइ माधवनारायण धलं दनाच्वंपिं व्रतालुतय् परदेश यात्रा शुरु जूगु दु । वंगु पोहेलागा त्रयोदशि (पुस ३०) कुन्हु धलं दनाच्वंगु थाय् शालीनदीं वज्रयोगिनीया लुखातक म्हधू दानाः परदेश यात्रा शुरु याःगु खः । परदेश यात्राया झ्वलय् पोहेलागा चतुर्दशि कुन्हु धलं दंपिं सकलें सक्वं वज्रयोगिनी व पशुपति तक न्यासि हे वनाः दर्शन याःगु खः । वंगु मगलवाः पशुपतिं फम्पिइ वनाः बासं च्वनाः बुधवाः अनं लिहां वःगु खः ।

थ्व हे झ्वलय् कन्हय् शनिवाः सक्वं पन्तिइ वनाः बासं च्वनीगु व कंस आइतवाः पन्तिं सक्वय् बासं च्वनेकथं लिहां वइगु श्री माधवनारायण स्वस्थानी व्रत तथा शालीनदी सुधार समितिया नायः राजभाई मानन्धरं कनादीगु दु । वयां कन्हय्कुन्हु धलं दंपिंसं श्रीपंचमि व मंगलवाः लगला सप्तमि न्यायेकी ।
थुकथं हे वइगु शुक्रवाः धलं दंपिंत खीर भोजन याकेगु व वयां कन्हय् कुन्हु सक्वं चाँगुनारायणय् बासं च्वनेकथं परदेश यात्रा याइ । माधवनारायण व्रत विधिकथं माघ १४ गते चाँगुनारायणं लिहां वयाः सक्व बासं च्वं वइ ।परदेश यात्राया झ्वलय् खालि तुतिं हे न्यासि वनेमाःगु नियम दुसा थथे न्यासि वनीगु इलय् माधवनाराणया मन्त्र जप यानाः वनेगु याइ ।