येँ–हेटौंडा निपुं लँ निला तक बन्द

येँ (नेपालभाषा टाइम्स)- येँनं कुलेखानी जुयाः हेटौंडा वनेगु निपुं लँपु निलाया निंतिं बन्द याःगु दु । कुलेखानी जुयाः भिमफेदी वनेगु लँपु दयेकेगु नितिं थ्व लँ बन्द याःगु खः ।

जिल्ला प्रहरी कार्यालय मकवानपुया कथं हेटौंडा भिमफेदी कुलेखानी जुयाः येँय् वनेगु गाडी म्हिगःनिसें चित्लाङ जुयाः थानकोटया लँपुं चले यायेगु व्यवस्था याःगु दु । उकथं हे येँया बल्खुं हेटौंडा वनीगु हल्का गाडीत आः यलया भट्टेडाँडां कान्तिलोकपथं चले याःगु दु ।

बागमति प्रदेशया मुख्यमन्त्री शालिकराम जम्मरकट्टेलं सरोकारवाला निकाय, यातायात व्यवसायी, स्थानीय प्रशासन व प्रहरीया मंकाः बैठकय् भिमफेदी कुलेखानी सतक मर्मत यायेगु निर्णय यानादीगु खः । थौंकन्हय् थ्व चीहाकःगु लँपु जुयाः येँ–हेटौंडा न्हिं निद्वःगः स्वयां अप्वः गाडी चले जुयाच्वंगु दु ।