ने. सं. ११४३ चौलाथ्व तृतीया -

रेष्टुरेन्ट याकनं बन्द यायेत उजं

येँ – सरकारं बहनी जुइगु व्यवसाय व रेष्टुरेन्ट ९ बजे लिपा बन्द यायेत इनाप याःगु दु । कोरोना संक्रमण नियन्त्रणया निंतिं जनस्वास्थ्य मापदण्डया उल्लंघन व कोरोनाया बेलायत भेरियन्ट अप्वया वनाच्वंगु ल्याःयात ध्यानय् तयाः स्वास्थ्य तथा जनसंख्या मन्त्रालयं बहनीया व्यवसाय कडा यायेत इनाप याःगु खः ।

स्वास्थ्य मन्त्रालयया सहप्रवक्ता डा. समीरकुमार अधिकारीं म्हिगः छगू सुचं जारी यासें संक्रमण रोग ऐन कथं कारबाही यायेत व छेँ पिने व सार्वजनिक थासय् अनिवार्य रुपं मास्क छ्यलेमाःगु व्यवस्था यायेत नं फुक्कं जिल्ला प्रशासन ज्याकूयात इनाप यानादीगु दु ।
उकथं हे कोरोना संक्रमितयात म्हसीकेगु कन्ट्याक्ट टे«सिङ अप्वयेकेत व ‘केस इन्भेस्टिगेसन’ या नितिं एन्टिजेन व माः कथं पीसीआर परीक्षण अप्वयेकेत नं मन्त्रालयं सम्बन्धित स्वास्थ्य ज्याकू व स्थानीय तहयात इनाप याःगु दु ।

अथे हे तःधंगु शहरय् न्यासः स्वयां अप्वः व चीधंगु शहरय् सछि स्वयां अप्वः सक्रिय संक्रमित लुल धाःसा उगु थासय् स्थानीय जनताया आवागमन कडाइ यायेत नं मन्त्रालयं इनाप याःगु दु । लिसें मन्त्रालयं विदेशं वइपिनिगु पुचः व भ्रमण दलया दुजःपिनिगु ल्याः व क्वारेन्टाइनया नियमयात नं कडाइ यायेत इनाप याःगु दु ।

उकथं हे स्वास्थ्य मन्त्रालयया प्रेस विज्ञप्तिइ येँ, पोखरा लिसें आपाः जनसंख्या दुगु शहरय् स्कुल कलेजय् नं कोरोना संक्रमण अप्वया वनाच्वंगु धासें शैक्षिक संस्थाय् उच्च सतर्कता नालेत इनाप याःगु दुसा अप्वः मनूत मुनिगु सपिङ मल, सिनेमा हल, नाचघर, हेल्थ क्लब, स्वीमिङ पुल पार्टी प्यालेस लिसें देय्न्यंकं उच्च स्वास्थ्य सुरक्षा सावधानी नालेत नं इनाप याःगु दु ।

थ्वहे झ्वलय् म्हिगः देय्न्यंकं ३३९ म्ह कोरोना संक्रमित पुष्टि जूगु दु । मन्त्रालयया कथं म्हिगः देय्न्यंकं ४१०० म्हेसिया पीसीआर टेष्ट याःगु खःसा २९८ म्ह संक्रमित पुष्टि जूगु खः । उकथं हे १०४० म्हेसित एन्टिजेन टेष्ट यायेगु झ्वलय् ४१म्हेसित कोरोना संक्रमित पुष्टि जूगु मन्त्रालयं धाःगु दु । थौंकन्हय् देय्न्यंकं २२०१ म्ह कोरोना भाइरस संक्रमित जुयाच्वंगु दु ।

भारतय् कोरोना संक्रमित अप्वया वनेवं नेपालय् नं उकिया लिच्वः लाःगु अनुमान जुयाच्वंगु दु । थ्वहे झ्वलय् नेपालय् युके भेरियन्टया ल्याः अप्वया वनाच्वंगु अनुमान जुयाच्वंगु दु ।