सगरमाथा आरोही पत्रकारबुद्धाचार्ययात अभिनन्दन

ख्वप – भक्तपुर सुनचाँदी व्यवसायी संघं विश्वया दकलय् तजाःगु च्वापुगुँ सगरमाथाया सफल आरोहण यानादीम्ह रोजिता बुद्धाचार्ययात छगू ज्याझ्वःया दथुइ नगदलिसें दोसल्लां न्ययेकाः अभिनन्दन याःगु दु । ज्याझ्वःया मूपाहां ख्वपया प्रमुख जिल्ला अधिकारी नारायणप्रसाद भट्टं नीद्वः तका दांलिसें दोसल्लां न्ययेकाः सम्मान यानादीगु खःसा ।

ज्याझ्वलय् विशेष पाहां नेपाल सुनचाँदी व्यवसायी महासंघया उपाध्यक्ष नापं ३ नं प्रदेशया संयोजक दियेशरत्न शाक्य, महानगरीय प्रहरी परिसर ख्वपया प्रमुख नापं प्रहरी उपरीक्षक हिमालयकुमार श्रेष्ठ लगायतया व्यक्तिपिंसं आरोही बुद्धाचार्ययात भिंतुना देछानादीगु खः ।

पेशा पत्रकारिता यानाच्वनादीम्ह आरोही बुद्धाचार्यं न्हापांगु मिसा पत्रकार सगरमाथा आरोहण दलय् सहभागि जुयाः सफल आरोहण यानादीगु खः । ज्याझ्वलय् व्यवहारिक लेखा तालिमया प्रशिक्षार्थीयात नं प्रमाण पत्र लःल्हाःगु खः । संघया अध्यक्ष पद्मसुन्दर शाक्यया सभापतित्वय् जूगु ज्याझ्वलय् वय्कलं हे लसकुस यानादीगु खः ।