फोरम, नयाँ शक्तिलिसे नं एकता वार्ता

येँ- नेपाल कम्युनिष्ट पार्टीं आः विचाः व कार्यशैलीइ तुलनात्मक रुपं सतीगु पार्टीत संघीय समाजवादी फोरम, नयाँ शक्ति पार्टी, नेकपा (क्रान्तिकारी–माओवादी) लगायतलिसे एकताया लागिं वार्ता सुरु याःगु दु ।

नकतिनि निम्ह मन्त्री सहित सरकारय् वःम्ह उपप्रधानमन्त्री उपेन्द्र यादव नेतृत्वया फोरमलिसे एकताका लागि अनौपचारिक सहलह सुरु याःगु दु । थ्व प्रक्रियां यानाः आः प्रदेश नं. २ या सत्ता गठबन्धनय् हेरफेर जुइ फुगु खँ समेत धाःगु दु । प्रतिनिधिसभाय् फोरमया १५ म्ह व नयाँ शक्तिया छम्ह सांसद दु ।

थ्वहे वंगु जेठ ३ गते एमाले व माओवादी केन्द्र एकता जुयाः दल दर्ता जुइवं विधान प्रकाशन व क्वय्या कमिटी एकता यायेगु आन्तरिक प्रक्रियाय् लगे जुयाच्वंगु नेकपां आः मेमेगु दलतलिसे नं वार्ताया लुखा चायेकागु खँ धाःगु दु । नेकपा स्थायी कमिटी दुजः देवेन्द्र पौडेलं धयादिल, ‘मुलुकया समृद्धिया लागि विगतय् फरक स्कुलिङं वःपिं व आः छगू हे कथंया प्रतिस्पर्धाय् दुपिं एमाले माओवादी केन्द्रया एकता लिपा आः मेमेगु पुचःलिसे नं एकता यायेत्यनागु खः ।’ नेता पौडेलं चन्द नेतृत्वया नेकपा व नारायणमान बिजुक्छे नेतृत्वया नेमकिपा बाहेक राजमोलगायत फुक्क कम्युनिष्ट पार्टीलिसेएकता यायेगु खँ कनादीगु दु ।