लानीपुखू दयेकेगु जिम्मा प्राधिकरणयात

राष्ट्रिय पुनःनिर्माण प्राधिकरणं लानीपुखूया पुनःनिर्माणया ज्या याइगु जूगु दु । सरकारं लानीपुखू व बालगोपालेश्वर देगः लगायत उगु लागाय् च्वंगु पुरातात्विक संरचनाया पुनःनिर्माण सम्बन्धी दक्वं ज्या प्राधिकरणं स्वयेगुकथं जिम्मेवारी बीवं पुनःनिर्माण यायेत्यंगु खः । परम्परागत शैली व मौलिकताया संरक्षण यानाः लानीपुखू जःखःया भाग प्रताप मल्लकालीन शैलीइ पुनःनिर्माण याइगु न्ह्यथंगु दु ।

लनीपुखुलिइ च्वंगु बालगोपालेश्वर देगः पुनःनिर्माण गुम्बज शैलीइ यायेगु खः कि ग्रन्थकुट शिखर शैलइि यायेगु धइगु खँय् विवाद ब्वलनाच्वंगु खः । विज्ञतय्सं बिउगु सुझावयात तकं आधार कयाः प्राधिकरणं संस्कृति, पर्यटन तथा नागरिक उड्डयन मन्त्रालय, पुरातत्व विभाग व येँ महानगरपालिकानाप समन्वय व सहजीकरण यानाः पुलांगु हे शैलीइ पुनःनिर्माण यायेगु निर्णय याःगु दु ।

थ्व हे माघ १४ गतेया मन्त्रिपरिषद्या बैठकं प्राधिकरणयात पुनःनिर्माणया जिम्मेवारी बियागु न्ह्यथनातःगु दु । प्राधिकरणं भूगर्भविदपाखें लानीपुखुलिइ लः गुकथं मुंके फइ व गुकथं थाका तये फइ धइगु विषयय् अध्ययन याःगु खः । विज्ञं ३०० फिट क्वं लः पिकाये फइगु व हाकुचाया प्रयोग यानाः लः थाका तये फइगु प्रतिवेदन बिउगु दु ।

प्राधिकरणया प्रमुख कार्यकारी अधिकृत सुशील ज्ञवालीं पुरातत्व विभाग, येँ महानगरपालिका, विज्ञ, सरोकारवाला संघसंस्था, स्थानीय समुदायलिसेया परामर्श व समन्वयय् प्रताप मल्लकालीन शैली, प्रविधि व निर्माण सामग्री प्रयोग यानाः पुनःनिर्माण यायेगु जुइ धयादिल ।