नेपाः–भारत १२ बुँदे विज्ञप्ति, पंचेश्वर त्वःफित
जलमार्ग जुयाः समुद्र वनेगु लँपु
रक्सौलया रेल येँ तक हइगु
येँ – थनिं २२ दँ न्ह्यः भारतलिसे जूगु पंचेश्वर परियोजना न्ह्यःने न्ह्याकेगु खँय् थुगुसी छुं हे खँ मजुल । भारत भ्रमणय् झाःम्ह प्रधानमन्त्री केपी ओली व भारतीय प्रधानमन्त्री नरेन्द्र मोदीं जारी यानादीगु मंकाः वक्तव्यय् पंचेश्वरया शब्द जक दुथ्याःगु दु, ज्याखँ धाःसा छुं हे समावेश मजुल । अथे हे निम्ह प्रधानमन्त्रीपिंसं मंकाः रुपं शिलान्यास याइ धाःगु अरुण–३ बारे नं शब्द जक दुथ्याकाः ज्या छुं हे मजुल ।
थनिं न्हय्ला न्ह्यः तत्कालिन प्रधानमन्त्री शेरबहादुर देउवां भारत भ्रमण याःबलय् पंचेश्वरया डीपीआर खुलाया दुने तयार यायेगु धकाः सहमति जूगु खःसा थुपालय् अज्याःगु सहमति तकं जूगु खने मंत । थ्व भ्रमणय् न्हूगु छुं हे सहमति जुइ मखु धाःसां स्वता खँय् धाःसा न्हूगु सहमति जूगु दु । उपिं खः मंकाः कृषि, नेपाःयात जलमार्ग मार्फत समुद्र तक वनेगु लँ बीगु व भारतया रक्सौल तक वयाच्वंगु रेलमार्गयात नेपाःया राजधानी येँ थ्यंक हे हयेगु ।रेलमार्गया लागिं आः वइगु दछिया दुने हे भारतं सम्भाव्यता अध्ययन यायेगु खँय् सहमति जूगु खँ धाःगु दु ।
नेपाः व भारतया निम्हं प्रधानमन्त्रीं भारतया मोतिहारींनिसें नेपाःया अमलेखगञ्ज तक वइगु पेट्रोलया पाइप लाइन तयेगु ज्याया शिलान्यास नं याःगु दु । थ्व पाइप लाइनया लागिं नं भारतं हे अप्वः लगानी याइगु खँ दु । तर थ्व पाइप लाइन तयेधुंकल कि नेपालं मेगु १५ दँ तक भारत बाहेक मेगु गनं नं पेट्रोल न्याये दइ मखु धइगु शर्त तयातःगु दु । नेपाः व भारतया खुल्ला सीमाय् लाःगु वीरगञ्जय् निगुलिं देय्या मंकाः चेकपोष्ट तयेगु खँ नं विज्ञप्तिइ उल्लेख दु । खुल्ला सीमाय् जुइ फइगु गलत ज्याखँ पनेगु लागिं अज्याःगु चेकपोष्ट तयेमाःगु खँ उकी धयातःगु दु ।प्रम ओली भ्रमण सिधयेकाः थौं स्वदेश लिहां झाइगु ग्वसाः दु ।
नेपाःया आन्तरिक मामिलाय् खँ मजू
मंकाः विज्ञप्तिइ न्हापा न्हापा थें नेपाःया आन्तरिक मामिलाया खँ नं दुथ्याकेगु ज्या धाःसा थुगुसी मजुल । थुकियात कुटनीतिक ख्यलं सकारात्मक रुपं काःगु दु । तर वक्तव्यय् भारतीय प्रधानमन्त्रीं नेपालय् ‘समावेशी विकास’ या खँ जूगु धकाः न्हूगु पदावली प्रयोग याःगु दु । नेपाःया संविधान, उकिया कार्यान्वयन थेंज्याःगु खँत थ्व विज्ञप्तिइ दुथ्यानाच्वंगु मदु । नेपाःयात लय्तायेके भारतं अथे याःगु अनुमान दु ।
LEAVE YOUR COMMENTS